२५ तासात बनवले १५ हजार ७७३ दोसे

 

 

Vishnu Manohar-Amaravati-Dosa विख्यात शेफ विष्णू मनोहर यांनी अमरावती शहरात सलग २५ तासात एकूण १५ हजार ७७३ दोसे बनवण्याचा नवा विक्रम नोंदवला आहे. विशेष म्हणजे, अमरावतीतनंतर आता ते थेट अमेरिकेत २६ तास दोसे बनवण्याच्या नव्या विक्रमासाठी सज्ज झालेत. यापूर्वी गत वर्षी विष्णू मनोहर यांनी नागपुरात २४ तासात १४ हजार ४०० दोसे बनवण्याचा विक्रम नोंदवला होता. आजच्या या नव्या विक्रमाची राज्यभरात चर्चा आहे.

 

 

 

 

 

 

 

Vishnu Manohar-Amaravati-Dosa अमरावती शहरात गुणवंत लॉन येथे शनिवारी सकाळी ७ वाजल्यापासून विष्णू मनोहर यांनी सलग २५ तास दोसे बनवण्याच्या विक्रमला सुरुवात केली. रविवारी सकाळी ६ वाजता त्यांनी १५ हजार ७०० दोसे बनवून आपला जुना विक्रम मोडीत काढला. पंचांनी मधात २० मिनिटे ब्रेक दिल्यावर विष्णू मनोहर यांनी गरम तव्यावर पुन्हा चवदार डोसे तयार करून अनेक अमरावतीकरांची सकाळ चवदार केली. ८ वाजता अखेरचा म्हणजे १५ हजार ७७३ वा दोसा विष्णू मनोहर यांनी तयार केला आणि त्यांच्या नव्या विक्रमाचा जल्लोष त्यांचे सहकारी आणि उपस्थित अमरावतीकरांनी टाळ्यांच्या कडकडाटाने केला. याप्रसंगी ’इंडिया वर्ल्ड रेकॉर्ड’चे प्रतिनिधी असणारे पंच प्रवीण राऊत यांनी पदक आणि प्रशस्तीपत्र विष्णू मनोहर यांना बहाल करत त्यांच्या नव्या विक्रमाची घोषणा केली.

 

 

 

Vishnu Manohar-Amaravati-Dosa शनिवारी सकाळी सात वाजल्यापासून विष्णू मनोहर यांनी दोसा बनवण्यास सुरुवात केली, तेव्हापासून अगदी पहाटे तीन वाजेपर्यंत अमरावतीकरांची गर्दी दोसा खाण्यासाठी उसळी होती. पहाटे तीन ते पाच याच वेळेस शांतता होती. पाच वाजल्यापासून आठ वाजेपर्यंत अमरावतीकरांचा प्रचंड उत्साह अनुभवला, असे विष्णू मनोहर म्हणाले. विष्णू मनोहर यांचा दोसे बनवण्याचा विक्रम हा अमरावतीकरांसाठी आनंदाची पर्वणी होती. तीस हजाराच्यावर अमरावतीकरांनी दोसाची चव चाखली. स्वतः विष्णू मनोहर यांनी १५ हजार ७७३ डोसे बनवले, तर त्यांच्यासोबत असलेल्या त्यांच्या पत्नी अपर्णा मनोहर आणि इतर सहकार्‍यांनी मिळून तीस हजारांच्या आसपास दोसे तयार केलेत.

 

 

 

Vishnu Manohar-Amaravati-Dosa शनिवारी रात्री बडनेराचे आमदार रवी राणा यांनी या दोासा उत्सवात सहभागी होत विष्णू मनोहर यांच्याबरोबर काही दोसे बनवलेत. या विश्वविक्रमी सोहळ्यात सहभागी प्रत्येकाला दोस्याची चव अगदी निःशुल्क चाखायला मिळाली. नागपूरला २४ तासात दोसे तयार करण्याचा नोंदवलेला स्वतःचा विक्रम अमरावतीत मोडला. यापुढे असे दहा मॅरेथॉन पूर्ण करायचे असून, पुढचा विक्रम अमेरिकेत केला जाणार आहे, असे विष्णू मनोहर यांनी जाहीर केले.