इसरो सतीश धवन अंतराळ केंद्रात मोठी भरती

ISRO भारतीय अंतरिक्ष संशोधन संस्था (इसरो)च्या सतीश धवन अंतरिक्ष केंद्र (SDSC SHAR) द्वारे विविध वैज्ञानिक, तांत्रिक व सहाय्यक पदांसाठी भरती प्रक्रिया सुरू करण्यात आली आहे. १६ ऑक्टोबर २०२५ रोजी प्रसिद्ध करण्यात आलेल्या जाहिरात क्रमांक SDSC SHAR/RMT/01/2025 अंतर्गत ही भरती केली जाणार असून, पात्र व इच्छुक उमेदवारांना १४ नोव्हेंबर २०२५ पर्यंत ऑनलाईन अर्ज करता येणार आहे. या भरतीसाठी अर्ज प्रक्रिया इसरोच्या अधिकृत संकेतस्थळावर सुरू असून, विविध शैक्षणिक पात्रता व क्षेत्रांमध्ये भरपूर संधी उपलब्ध आहेत.

 

 

 

 

या भरतीत ISRO वैज्ञानिक सहाय्यक, तांत्रिक सहाय्यक, तंत्रज्ञ, ड्राफ्ट्समन तसेच इतर सहाय्यक कर्मचाऱ्यांच्या विविध पदांचा समावेश आहे. यामध्ये श्रीहरीकोटा, रसायनी आणि सिकंदराबाद येथील रिक्त जागांसाठी उमेदवारांची निवड केली जाणार आहे. यापैकी काही पदे दिव्यांग (PwBD) उमेदवारांसाठी राखीव ठेवण्यात आली आहेत.तांत्रिक सहाय्यक पदांसाठी केमिकल, मेकॅनिकल, ऑटोमोबाईल, इलेक्ट्रिकल, सिव्हिल, कॉम्प्युटर सायन्स आणि इलेक्ट्रॉनिक्स अँड कम्युनिकेशन अशा विविध शाखांमधील डिप्लोमा धारक उमेदवार पात्र आहेत. वैज्ञानिक सहाय्यक पदासाठी प्रथम श्रेणीत बी.एससी. पदवी असणे आवश्यक असून, याचे वेतनस्तर सातव्या वेतन आयोगानुसार ₹४४,९०० ते ₹१,४२,४०० इतके आहे.

 

या पदांसाठी उमेदवारांची निवड लेखी परीक्षेच्या आधारे केली जाणार असून, काही पदांसाठी कौशल्य चाचणी घेण्यात येईल. मात्र अंतिम निवड फक्त लेखी परीक्षेच्या गुणांवरच आधारित असेल, अशी माहिती इसरो प्रशासनाने दिली आहे.तंत्रज्ञ ‘बी’ या पदासाठी केमिकल, फिटर, इलेक्ट्रॉनिक मेकॅनिक, डिझेल मेकॅनिक, रेफ्रिजरेशन व एअर कंडिशनिंग अशा ट्रेडमध्ये आयटीआय, एनटीसी किंवा एनएसी प्रमाणपत्र असणे आवश्यक आहे. हे पद मुख्यतः श्रीहरीकोटा आणि रसायनी केंद्रांमध्ये उपलब्ध आहेत.

 

ड्राफ्ट्समन ‘बी’ पदासाठी सिव्हिल ड्राफ्ट्सिंग क्षेत्रातील उमेदवारांना संधी असून, हे पद श्रीहरीकोटा आणि सिकंदराबाद येथे भरले जाणार आहे. याशिवाय सहाय्यक कर्मचाऱ्यांमध्ये स्वयंपाकी, अग्निशमन कर्मचारी, लाइट व्हेईकल ड्रायव्हर आणि परिचारिका (नर्स) अशा पदांचाही समावेश आहे. विशेषतः सिकंदराबादमध्ये ओबीसी प्रवर्गातील उमेदवारांसाठी संगणक विज्ञान क्षेत्रातील तंत्रज्ञ पद उपलब्ध आहे.या सर्व पदांसाठी इच्छुक उमेदवारांनी इसरोच्या अधिकृत संकेतस्थळावर ([https://www.isro.gov.in](https://www.isro.gov.in)) जाऊन जाहिरात तपशील काळजीपूर्वक वाचावेत आणि आवश्यक त्या कागदपत्रांसह ऑनलाईन अर्ज भरावा. अर्ज करण्याची अंतिम तारीख १४ नोव्हेंबर २०२५ असून, उशिरा आलेले किंवा अपूर्ण अर्ज स्वीकारले जाणार नाहीत.या भरती प्रक्रियेमुळे देशातील अभियंता, वैज्ञानिक व तांत्रिक शिक्षण घेणाऱ्या तरुणांना अंतराळ क्षेत्रात काम करण्याची सुवर्णसंधी मिळणार आहे. भारतीय अंतराळ संशोधन संस्थेचा एक महत्त्वाचा घटक असलेल्या सतीश धवन अंतरिक्ष केंद्रातील ही भरती, देशाच्या अंतराळ मोहिमांमध्ये नवे मनुष्यबळ जोडणारी ठरणार आहे.