सहकारी बँकांमुळे स्थानिक विकासाला चालना

Devendra Fadnavis : ज्या ठिकाणी चांगल्या सहकारी बँक निर्माण होतात, त्या ठिकाणी आर्थिक सक्षमता वाढते. नव उद्योजकांना प्रोत्साहन देण्यासाठी या बँक महत्त्वपूर्ण ठरतात. सहकारी बँकांमुळे स्थानिक भांडवल निर्मिती व विकास साध्य होतो, असे प्रतिपादन मुख्यमंत्री देवेंद्र फडणवीस यांनी केले.

 

 

 

 

 

 

 

येथील अभिनंदन अर्बन को-ऑपरेटिव्ह बँकेच्या ’अभिनंदन हाईट्स’ या नूतन इमारतीचे गुरूवारी दुपारी उद्घाटन केल्यानंतर संत ज्ञानेश्वर सांस्कृतिक भवन येथे आयोजित कार्यक्रमात ते बोलत होते. सहकार राज्यमंत्री पंकज भोयर, आ. सुलभा खोडके, आ. रवी राणा, भारतीय जैन संघटनेचे संस्थापक शांतीलाल मुथ्था, बँकेचे संस्थापक हुकुमचंद डागा, अभिनंदन अर्बन को-ऑपरेटिव्ह बँकेचे अध्यक्ष अ‍ॅड. विजय बोथरा आदी मान्यवर यावेळी उपस्थित होते.

 

 

मुख्यमंत्री फडणवीस म्हणाले, सहकारी बँकेमुळे तळागाळातील नागरिकांचा विकास होतो. शेतकरी व लघु उद्योगांना त्वरित कर्ज व बचत सुविधा मिळते. ज्यांना व्यवसाय, उद्योग धंदा स्थापन करावयाचा आहे, त्यांना सुरुवातीला कर्ज लागते. त्यावेळी या बँकेचे प्रोत्साहन व सहकार्य महत्त्वपूर्ण ठरते. राज्यात सहकारी बँकांनी कालानुरुप बदल केले आहेत. त्यामुळे राष्ट्रीयकृत बँकांच्या स्पर्धेत त्या उत्तमस्थान टिकवून आहेत. प्रधानमंत्री नरेंद्र मोदी यांनी सहकाराचे महत्त्व जाणून ’सहकारिता मंत्रालय’ स्थापन केले आहे. यामुळे सहकार क्षेत्रात मोठे बदल होत आहे. ’सहकारातून समृद्धीकडे’ हा मार्ग जात आहे. गुणवत्तापूर्ण कार्य करून ’अभिनंदन सहकारी बँक’ सहकार क्षेत्रात चांगले योगदान देत आहे. ही बँक सर्व मानकांवर उत्तम कार्य करीत आहे. अभिनंदन बँकेला सहकार क्षेत्रातील उत्कृष्ट कार्याबद्दल राज्य शासनामार्फत गौरविण्यात आले आहे. ग्राहकांनी या बँकेत ३७३.७७ कोटी जमा केले आहेत.

 

 

 

बँकेने २५३.९७ कोटी रुपयांचे कर्ज वाटप केले आहे. कर्जाची गुणवत्ता नेट एन.पी.ए. हे शून्य टक्के आहे. नेट एनपीए हे बँकेच्या उत्कृष्ट व्यवस्थापनाचे लक्षण आहे. बँक योग्य आर्थिक नियोजन करून आपल्या ग्राहकांना तत्पर आणि अत्याधुनिक सेवा पुरवित असल्याचे मुख्यमंत्र्यांनी सांगितले. बँकेचे संस्थापक हुकुमचंद डागा यांचा शाल -श्रीफळ तसेच सन्मानचिन्ह देवून मुख्यमंत्र्यांनी सत्कार केला. बँकेने ५ लाख ५१ हजाराचा धनादेश मुख्यमंत्री सहाय्यता निधीसाठी दिला. बँकेचे अध्यक्ष विजय बोथरा यांनी प्रास्ताविक केले. कार्यक्रमाचे संचालन प्राजक्ता चौधरी यांनी तर आभार संचालक मंडळाचे अध्यक्ष सुदर्शन गांग यांनी मानले. यावेळी नवीन चोरडीया, डॉ. सुरेंद्र बरडिया, सुदर्शन गांग, राजेंद्र सिंघई, कंवरीलाल ओस्वाल, राजेंद्र भंसाली, किशोर बोकरीया, अ‍ॅड. गौरव लुनावत, अरूण कडू, सुनील सरोदे, शंकर शिंदे, सरला भंसाली, किरणताई जैन, अ‍ॅड. भारतप्रकाश खजांची, श्रेणिक बोथरा, शितलकुमार लुनावत, बँकेचे मुख्य कार्यकारी अधिकारी शिवाजी देठे, उपमुख्य कार्यकारी अधिकारी अनिल उगले व बँकेचे अन्य अधिकारी व कर्मचारी, सभासद उपस्थित होते.