८० हजार महिलांना सक्षमीकरणाचा नवा मार्ग -पालकमंत्री बावनकुळे

Chandrashekhar Bawankule महिलांच्या सर्वांगिण विकासासाठी जिल्ह्यात एक महत्वाकांक्षी उपक्रम सुरु झाला आहे. ‘नवसखी उद्योगिनी योजना’ या नव्या योजनेच्या शुभारंभ कार्यक्रमात राज्याचे महसूल मंत्री व पालकमंत्री चंद्रशेखर बावनकुळे यांनी हे उपक्रमाचे उद्दिष्ट स्पष्ट केले. त्यांनी सांगितले की, जिल्ह्यातील ८ हजार बचत गटांमार्फत सुमारे ८० हजार महिलांना आर्थिक व व्यावसायिकदृष्ट्या सक्षम केले जाणार आहे.

 

 

कोराडी येथील महालक्ष्मी–जगदंबा संस्थान परिसरातील ज्योत भवनात आयोजित कार्यक्रमात या योजनेचा शुभारंभ करण्यात आला. यावेळी राज्याचे वित्त राज्यमंत्री ॲड. आशिष जयस्वाल, खासदार श्यामकुमार बर्वे, आमदार चरणसिंह ठाकूर, आमदार डॉ. आशिष देशमुख, जिल्हा परिषदेचे मुख्य कार्यकारी अधिकारी विनायक महामुनी, माजी आमदार टेकचंद सावरकर, तसेच अनेक पदाधिकारी व अधिकारी उपस्थित होते.पालकमंत्री बावनकुळे म्हणाले की, “उमेद सारखी संस्था तयार करून शहरी तसेच ग्रामीण भागातील महिलांना व्यवसायासाठी प्रोत्साहित करणे हा आमचा उद्देश आहे. नवसखी उद्योगिनी योजना कर्ज योजना नाही; या योजनेंतर्गत प्रत्येक बचत गटाला व्यवसाय सुरू करण्यासाठी एक लाख रुपयांचा धनादेश बीज भांडवल म्हणून दिला जाईल.”योजना टप्प्याटप्प्याने राबवली जाणार असून पहिल्या टप्प्यात १ हजार ६०० बचत गटातील १६ हजार महिलांना निधी दिला जात आहे. पालकमंत्री यांनी प्रत्येक समूदाय संसाधन व्यक्तीस समन्वय व संपर्कासाठी मोबाईल देण्याचे आणि पुढील आर्थिक वर्षात दर्जेदार इलेक्ट्रिक वाहन उपलब्ध करून देण्याचेही सूचित केले.

 

 

 

 

राज्यमंत्री ॲड. आशिष जयस्वाल यांनी सांगितले की, “ग्रामीण भागातील Chandrashekhar Bawankule  महिलांना व्यवसायासाठी भांडवली गुंतवणुकीसाठी अडथळे येत होते. नवसखी उद्योगिनी योजनेतून हा अडथळा दूर होत असून महिलांना व्यवसायात प्रगतीसाठी नवे मार्ग उघडले जात आहेत. राज्य सरकार सामाजिक न्याय आणि महिला सक्षमीकरणासाठी कटिबध्द आहे.”पालकमंत्री बावनकुळे यांनी महिलांना मार्गदर्शन करताना म्हटले की, “या निधीचा उपयोग व्यक्तीगत खर्चासाठी किंवा जुने कर्ज फेडण्यासाठी होऊ नये. प्रत्येक गटाने आपला व्यवसाय अधिकाधिक सक्षम बनवण्यासाठी या निधीचा उपयोग करावा. कोणत्याही परिस्थितीत या योजनेच्या नावाखाली राजकीय स्वरुप येऊ नये, याची खबरदारी घेणे अत्यंत आवश्यक आहे.”

 

 

मुख्य कार्यकारी अधिकारी विनायक महामुनी यांनी कार्यक्रमाचे प्रास्ताविक केले. त्यांनी या योजनेच्या यशस्वी अंमलबजावणीसाठी प्रशासनाची पूर्ण तयारी असल्याचे सांगितले. भविष्यात या महिलांच्या व्यवसायातील उत्पादनांना महानगरातील ग्राहकांपर्यंत पोहोचवण्यासाठी राज्यात १० उमेद मॉल साकारण्यात येणार आहेत, असे वित्त राज्यमंत्री ॲड. आशिष जयस्वाल यांनी सांगितले.योजना केवळ व्यवसायासाठी निधी पुरवण्यापुरती मर्यादित नसून, महिलांच्या सक्षमीकरणासाठी एक आदर्श मापदंड निर्माण करण्याचा उद्देश आहे. पालकमंत्री बावनकुळे यांनी विश्वास व्यक्त केला की या ८० हजार महिलांचे यशस्वी व्यवसाय इतर महिलांसाठी प्रेरणास्थान ठरेल.