धक्कादायक! तरुण युवकाची "नग्नावस्थेत" धिंड... तालिबानी शिक्षा

Koni village viral video मध्य प्रदेशातील मऊगंज जिल्ह्यातील कोनी गावातून माणुसकीला काळिमा फासणारी एक धक्कादायक घटना समोर आली आहे. येथे काही दबंगांनी एका युवकास केवळ उधारीच्या वादातून बेदम मारहाण करून त्याला नग्नावस्थेत संपूर्ण गावभर फिरवले. या प्रकाराचा व्हिडीओ सोशल मीडियावर मोठ्या प्रमाणावर व्हायरल होत असून, घटनेनंतर पोलिसांनी तत्काळ कारवाई करत चार आरोपींना अटक केली आहे.

 

 

 

ही घटना कोनी पोलीस ठाण्याच्या हद्दीतील असून, पीडित युवकाचे नाव मनीष यादव आहे. मनीष हा हनुमना पोलीस ठाण्याच्या क्षेत्रातील कोनी गावातील रहिवासी आहे. त्याच्या आरोपानुसार, गावातीलच चार तरुण — अनिल कुशवाहा, लालमणि कुशवाहा, सोहन कुशवाहा आणि सुनील कुशवाहा — यांनी त्याला उधारीच्या पैशांच्या कारणावरून मारहाण केली. इतकेच नव्हे, तर त्याला कपडे काढून संपूर्ण गावात अपमानास्पद रीतीने फिरवले गेले.

 

 

व्हायरल व्हिडीओत या घटनेचे अत्यंत क्लेशदायक दृश्य दिसून येते. पीडित युवक नग्न अवस्थेत असून, काही तरुण त्याला जबरदस्तीने चालवत आहेत. युवक अत्यंत भयभीत अवस्थेत असून, त्याचे डोळे खाली झुकलेले दिसतात. हा व्हिडीओ जवळपास एक महिना जुना असल्याचे पोलिसांनी सांगितले असून, तो अलीकडेच सोशल मीडियावर समोर आला आहे.

 

 

पोलिसांच्या प्राथमिक तपासानुसार, हा प्रकार काही दिवसांपूर्वी घडलेला असून, आता याची गंभीर दखल घेण्यात आली आहे. पीडित मनीषने दिलेल्या तक्रारीत म्हटले आहे की, आरोपींनी त्याच्याकडे शराबसाठी १२०० रुपयांची मागणी केली होती. पैसे देण्यास नकार दिल्यानंतर त्याला शिवीगाळ करत बेदम मारहाण करण्यात आली आणि त्यानंतर नग्न अवस्थेत गावभर फिरवले गेले.या घटनेची माहिती मिळताच पोलीस प्रशासनाने तातडीने कारवाई करत चौघा आरोपींना अटक केली आहे. सर्व आरोपी कुशवाहा समाजातील असून, सध्या त्यांच्याविरुद्ध गंभीर गुन्हे दाखल करण्यात आले आहेत. पोलीस अधीक्षकांनी स्पष्ट केले की, आरोपींवर कठोर कारवाई केली जाईल आणि समाजात भीती निर्माण करणाऱ्या अशा प्रवृत्तींना कुठलाही पाठींबा दिला जाणार नाही.

 

 

सध्या संपूर्ण गावात या प्रकारामुळे तणावाचे वातावरण आहे. सामाजिक माध्यमांवर या घटनेविरोधात तीव्र प्रतिक्रिया उमटत असून, आरोपींना कठोर शिक्षा देण्याची मागणी जोर धरत आहे. प्रशासनाकडून या प्रकरणाची सखोल चौकशी सुरु असून, आणखी काही आरोपी असल्याची शक्यता नाकारता येत नाही.

 

 

ही घटना केवळ कायद्याचा भंग नाही, तर मानवी मूल्यांचाही गंभीर अपमान आहे. आता पाहावे लागेल की या प्रकरणात न्याय किती लवकर मिळतो आणि दोषींना काय शिक्षेचा सामना करावा लागतो.