यंदा सोयाबीनला मिळणार ५,००० रुपयांपर्यंत भाव?

Soybean price will be गेल्या दोन महिन्यांपासून सुरू असलेल्या सततच्या पावसामुळे खरीप हंगामातील प्रमुख पीक सोयाबीनला मोठा फटका बसला आहे. पिकांच्या शेंगा काळ्या पडल्या, दाण्यांचा आकार लहान राहिला, तर काही ठिकाणी अंकुर फुटल्यामुळे मालाचा दर्जा खालावला आहे. परिणामी, यंदा सोयाबीनचे एकरी उत्पादन घटले असून शेतकऱ्यांचे आर्थिक गणित प्रभावित झाले आहे.

 

 

 

तथापि, दर्जेदार मालाला अधिक दर मिळण्याची शक्यता असल्याने बाजारात आशेची किरणे दिसत आहेत. गेल्या दोन महिन्यांपासून अनियमित आणि जोरदार पावसामुळे काही भागात पिके पूर्णपणे पाण्याखाली गेली आहेत, तर काही ठिकाणी शेंगा सडल्या किंवा अंकुर फुटले. कृषितज्ज्ञांचे म्हणणे आहे की, या नैसर्गिक संकटामुळे सोयाबीनचे एकरी उत्पादन लक्षणीयरीत्या कमी झाले आहे. कारंजा परिसरातील शेतकऱ्यांनी सांगितले, शेतात पाणी साचल्यामुळे शेंगा काळ्या पडल्या आणि दाणे पूर्ण वाढू शकले नाहीत. त्यामुळे दर्जा खालावला आणि दरात घट झाली.

 

 

४ ऑक्टोबरला बाजारात सुमारे २०० क्विंटल सोयाबीनची आवक झाली, ज्याचा सरासरी दर ३,६०० रुपये प्रतिक्विंटल इतका राहिला. व्यापाऱ्यांच्या मते, सध्या दर स्थिर असले तरी मालाचा दर्जा चांगला असल्यास अधिक दर मिळू शकतात. या कारणास्तव बाजारात दर्जेदार सोयाबीनसाठी स्पर्धा वाढली आहे, तर सामान्य दर्जाच्या मालाला मर्यादित मागणी आहे. कारंजा तालुक्यातील काही शेतकऱ्यांनी लवकर येणाऱ्या वाणाची लागवड केली होती आणि त्यांची काढणी सुरू झाली आहे. सध्या बाजारात उच्च दर्जाच्या सोयाबीनचा पुरवठा कमी असल्यामुळे व्यापाऱ्यांकडून त्याला जास्त दर मिळण्याची शक्यता वर्तवली जात आहे. कृषितज्ज्ञांचे मत आहे की, जर हवामान ऑक्टोबरच्या दुसऱ्या आठवड्यापर्यंत स्थिर राहिले, तर बाजारातील दर स्थिरावतील आणि उत्पादनात थोडी सुधारणा दिसून येईल.