अलर्ट...जैश-ए-मोहम्मदने सुरू केली महिला दहशतवादांची भरती!

Jaish-e-Mohammed Women Recruitment ऑपरेशन सिंदूरनंतर दहशतवादी संघटना जैश-ए-मोहम्मद (जेईएम) आपल्या कारवायांमध्ये महिलांचा समावेश करण्याचा निर्णय घेतल्याचे सध्या सुरक्षा यंत्रणांनी उघड केले आहे. जैशने दहशतवादी मसूद अझहरला लिहिलेल्या पत्राद्वारे महिलांची भरती सुरू असल्याची घोषणा केली. या नव्या महिला शाखेचे नाव जमात-अल-मोमिनत ठेवण्यात आले असून, ही शाखा मसूद अझहरची बहीण चालवत आहे.

 

 

 

 

सूत्रांनी सांगितले की जैशने आपल्या कमांडरांच्या पत्नींसह बहावलपूर, कराची, मुझफ्फराबाद, कोटली, हरिपूर आणि मानसेरा येथील मरकझांमध्ये शिक्षण घेणाऱ्या गरीब महिलांना या महिला शाखेत भरती केले आहे. पूर्वी देवबंदी विचारसरणीने प्रभावित झालेल्या जैश-ए-मोहम्मदने महिलांना युद्धात सामील होण्यास किंवा शस्त्रे हाताळण्यास विरोध केला होता, मात्र पहलगाम हल्ला आणि ऑपरेशन सिंदूरनंतर परिस्थिती बदलल्याने मसूद अझहर आणि त्याचा भाऊ तल्हा अल-सैफ यांनी महिलांना दहशतवादी कारवायांमध्ये सहभागी करण्याचा निर्णय घेतला.

 

बहावलपूरमधील मरकझ उस्मान-ओ-अली येथेही महिलांची भरती सुरू करण्यात आली आहे. जैशच्या प्रचार शाखेने प्रसिद्ध केलेल्या पत्रात म्हटले आहे की या महिला शाखेची प्रमुख ही मसूद अझहरची बहीण आहे. तिचा पती, युसूफ अझहर, ऑपरेशन सिंदूर दरम्यान भारताच्या हल्ल्यात जैशच्या मुख्यालयावर मारला गेला होता. इतिहास पाहता, इस्लामिक स्टेट ऑफ इराक अँड सीरिया (आयएसआयएस), बोको हराम, हमास आणि लिबरेशन टायगर्स ऑफ तमिळ इलम (एलटीटीई) यांसारख्या दहशतवादी संघटनांनी महिलांचा वापर आत्मघाती बॉम्बस्फोटासाठी केला आहे. मात्र, जैश-ए-मोहम्मद, लष्कर-ए-तैयबा आणि हिजबुल मुजाहिदीनने यापूर्वी अशा उद्देशासाठी महिलांचा वापर केलेला नव्हता. तज्ज्ञांचे म्हणणे आहे की जैशने आता जमात-अल-मोमिनत महिला पथक तयार करून त्यांचा वापर आत्मघाती बॉम्बस्फोटांसाठी करण्याची शक्यता आहे.

 

सुरक्षाक्षेत्रातील तज्ज्ञांचे म्हणणे आहे की या नव्या बदलामुळे जैशच्या कारवायांचा धोका अधिक वाढेल. महिलांचा सहभाग संघटनेला अधिक गुप्त, अनपेक्षित आणि धोकेदायक कारवाई करण्याची क्षमता देईल. त्यामुळे भविष्यात भारतासह जागतिक स्तरावर जैश-ए-मोहम्मदच्या दहशतवादी कारवायांमध्ये महिलांचा वापर वाढण्याची दाट शक्यता आहे. या परिस्थितीमुळे सुरक्षा आणि गुप्तहेर यंत्रणांमध्ये सतर्कता वाढवण्यात आली आहे. जैश-ए-मोहम्मदच्या नव्या महिला पथकाच्या कारवायांवर लक्ष ठेवणे आणि संभाव्य धोक्यांपासून नागरिकांचे संरक्षण करण्यासाठी आवश्यक उपाययोजना करण्याची गरज तज्ज्ञांनी अधोरेखित केली आहे.