नोव्हेंबरमध्ये तब्बल ११ दिवस बँका बंद! बघा सुट्ट्यांची यादी

Banks closed in November नोव्हेंबर महिना सुरू होताच रिझर्व्ह बँक ऑफ इंडियाने (RBI) देशभरातील बँकांच्या सुट्ट्यांची यादी जाहीर केली आहे. या यादीतून हे स्पष्ट झाले आहे की नोव्हेंबर महिन्यात बँका तब्बल ११ दिवस विविध कारणांमुळे बंद राहणार आहेत. या सुट्ट्यांमध्ये काही राष्ट्रीय पातळीवरील आहेत, तर काही विशिष्ट राज्यांतील धार्मिक आणि सांस्कृतिक सणांशी संबंधित आहेत. त्यामुळे जर तुम्हाला या महिन्यात बँकेचे कोणतेही महत्त्वाचे काम उरकायचे असेल, तर आधीच आपल्या शहरातील सुट्ट्यांचा तपशील जाणून घेणे आवश्यक आहे, अन्यथा काम अडकण्याची शक्यता आहे.

 

 

 

या महिन्याची सुरुवातच सुट्टीने होत आहे. १ नोव्हेंबर रोजी कर्नाटक राज्य उत्सव दिनानिमित्त राज्यातील सर्व बँका बंद राहतील. हा दिवस कर्नाटकाच्या स्थापनेचा वर्धापन दिन म्हणून साजरा केला जातो. त्याच दिवशी उत्तराखंडमध्ये "इगास-बागवाल" हा स्थानिक सण साजरा होत असल्याने तेथेही बँक व्यवहार होणार नाहीत. यानंतर ५ नोव्हेंबर रोजी देशभरात गुरु नानक जयंती आणि कार्तिक पौर्णिमेचे औचित्य साजरे केले जाणार आहे. त्यामुळे दिल्ली, पंजाब, हरियाणा, उत्तर प्रदेश, मध्य प्रदेश, महाराष्ट्र, राजस्थान, पश्चिम बंगाल, झारखंड, उत्तराखंड, मिझोराम, ओडिशा, तेलंगणा आणि जम्मू-काश्मीरसह अनेक राज्यांमध्ये बँका त्या दिवशी बंद राहतील.

 

 

मेघालयमध्ये ६ आणि ७ नोव्हेंबर रोजी अनुक्रमे "नोंगक्रेम नृत्य महोत्सव" आणि "वंगाला महोत्सव" साजरे केले जातील, त्यामुळे त्या दोन दिवसांत तेथील बँका बंद राहतील. यानंतर ८ नोव्हेंबरला कर्नाटकात संत आणि कवी कनकदास जयंती असल्याने तेथील बँक व्यवहार थांबतील. याशिवाय, नियमित सुट्ट्यांच्या रूपात दर रविवारी आणि दुसऱ्या तसेच चौथ्या शनिवारी बँका बंद असतात. त्यामुळे नोव्हेंबरमध्ये २, ८, ९, १६, २२, २३ आणि ३० नोव्हेंबर या तारखांना साप्ताहिक सुट्ट्या येतील. एकूणच नोव्हेंबर महिन्यात बँका एकत्रितपणे ११ दिवस बंद राहणार असल्याने ग्राहकांना शाखेत जाऊन व्यवहार करायचे असल्यास आपली कामे आधीच नियोजित करणे आवश्यक आहे. मात्र, ग्राहकांसाठी सुखद बाब म्हणजे नेट बँकिंग आणि मोबाइल बँकिंग सेवा या सर्व दिवसांमध्ये पूर्ववत सुरू राहतील, त्यामुळे डिजिटल माध्यमांतून व्यवहार करण्यात कोणतीही अडचण येणार नाही.