समाजवादी पक्ष बीएमसी निवडणूक 'एकला चलो रे'

Samajwadi Party BMC Election मुंबईत आगामी बृहन्मुंबई महानगरपालिका (बीएमसी) निवडणुकांचा राजकीय तापमान चढत असताना समाजवादी पक्षाने मोठा राजकीय स्फोट घडवून आणला आहे. पक्षाच्या महाराष्ट्र शाखेचे अध्यक्ष अबू असीम आझमी यांनी बुधवारी पत्रकार परिषदेत जाहीर केले की समाजवादी पक्ष या निवडणुका पूर्णपणे स्वबळावर लढवणार आहे. काँग्रेससह कोणत्याही पक्षाशी युती न करण्याचा निर्णय घेतल्याची स्पष्ट घोषणा त्यांनी केली. आझमी म्हणाले, “महाराष्ट्र विधानसभा निवडणुकीप्रमाणेच समाजवादी पक्ष बीएमसी निवडणुका स्वबळावर लढेल. काँग्रेस शेवटच्या क्षणी आमचा विश्वासघात करते, भूमिकेत बदल करते आणि भागीदारीचे वचन पाळत नाही. त्यामुळे यावेळी आम्हाला कोणावरही अवलंबून राहायचे नाही.” त्यांच्या या वक्तव्यामुळे काँग्रेससोबतच्या नात्यातील वाढत्या दुराव्याचा पुन्हा एकदा प्रत्यय आला.

 

 

 

 

समाजवादी पक्ष सुमारे १५० जागांवर उमेदवार उतरवणार असल्याचे त्यांनी सांगितले. २२७ जागांच्या बीएमसीमध्ये ही मोठी आकडेवारी असून, पक्षाच्या वाढत्या महत्त्वाकांक्षेची ही स्पष्ट झलक आहे. “हा निर्णय पक्षाचे राष्ट्रीय अध्यक्ष अखिलेश यादव यांच्याशी चर्चा करूनच घेण्यात आला आहे. काँग्रेस अल्पसंख्याक समुदायांसाठी काहीही करत नाही, त्यांच्या अहंकारामुळे पक्षाची अवस्था बिकट झाली आहे. आज काँग्रेसमध्ये सक्षम नेतृत्वाचा अभाव आहे,” असेही आझमी म्हणाले.

मुंबईसारख्या राजकीय केंद्रस्थानी बीएमसी निवडणुका नेहमीच राज्यव्यापी समीकरणांवर परिणाम घडवितात. त्यामुळे सर्वच पक्षांमध्ये उमेदवार निवड, युती आणि रणनीतीबाबत हालचाली वाढल्या आहेत. समाजवादी पक्षाच्या या निर्णयामुळे महाविकास आघाडीतील समन्वयावर प्रश्नचिन्ह निर्माण झाले आहे. या सर्व घडामोडींमुळे बीएमसी निवडणुकीची लढत अधिकच रंगतदार बनली असून विरोधकांत समन्वय हरवण्याची चिन्हे स्पष्टपणे दिसू लागली आहेत. समाजवादी पक्षाच्या स्वतंत्र लढाईच्या निर्णयामुळे मुंबईतील राजकीय गणिते नव्याने मांडली जात असून आगामी काही दिवसांत आणखी नाट्यमय घडामोडी घडण्याची शक्यता आहे.