"भारताने दिलेली साथ आम्ही विसरणार नाही"; इस्रायलने व्यक्त केली भारताबद्दल कृतज्ञता

israel-expresses-gratitude-to-india इस्रायलचे परराष्ट्रमंत्री गिदोन सा’आर यांनी भारताबद्दल कृतज्ञता व्यक्त करत दोन्ही देशांमधील संबंधांना “इतिहासातील सर्वाधिक मजबूत टप्पा” असे वर्णन केले आहे. एका खासगी वृत्तवाहिनीला दिलेल्या मुलाखतीत त्यांनी भारताला “जगातील उदयोन्मुख महासत्ता” म्हटले आणि सांगितले की भारत-इस्रायल संबंध केवळ संरक्षण आणि नवोन्मेष या क्षेत्रांपुरते मर्यादित नसून, आर्थिक सहकार्य, दहशतवादविरोधी मोहीम आणि जागतिक शांततेसाठीचे प्रयत्न या सर्व आघाड्यांवर अधिक गहिरे झाले आहेत.

 

 

गिदोन सा’आर म्हणाले, “आम्ही सतत प्रगतीच्या दिशेने वाटचाल करत आहोत. भारताशी असलेल्या मैत्रीबद्दल आम्ही मनापासून आभारी आहोत. संरक्षण, शेती आणि अर्थव्यवस्था या क्षेत्रांमध्ये आम्ही सातत्याने पुढे जात आहोत आणि या नात्याला अधिक सशक्त करण्याचा आमचा निर्धार आहे.” ७ ऑक्टोबर रोजी हमासने इस्रायलवर केलेल्या हल्ल्यानंतर भारताने दिलेल्या तात्काळ प्रतिसादाचे त्यांनी विशेष कौतुक केले. “त्या क्षणी भारताचे पंतप्रधान नरेंद्र मोदी हे पहिले जागतिक नेते होते ज्यांनी पंतप्रधान नेतान्याहूंना थेट फोन करून सहकार्याचे आश्वासन दिले. israel-expresses-gratitude-to-india त्या वेळचे भारताचे साथ आम्ही विसरणार नाही,” असे सा’आर म्हणाले.

गाझा शांतता प्रक्रियेबाबत बोलताना त्यांनी म्हटले की, “ट्रम्प शांतता योजना ही एक व्यवहार्य पायरी-दर-पायरी रचना आहे. भारतासारखा जागतिक नेता या प्रक्रियेला योग्य मार्गावर ठेवण्यात निर्णायक भूमिका बजावतो.” ते पुढे म्हणाले की भारत आणि इस्रायल दोघेही दहशतवादाच्या वेदना सामायिक करतात. “भारताला दहशतवादाचे भयावह परिणाम चांगले माहीत आहेत. आम्ही लष्कर-ए-तैयबा सारख्या संघटनांना दहशतवादी घोषित करतो आणि माहिती, तंत्रज्ञान तसेच संरक्षण क्षेत्रात एकत्र काम करतो,” असे त्यांनी नमूद केले. आर्थिक व संपर्क प्रकल्पांबाबत सा’आर यांनी सांगितले की “इंडिया-मिडल ईस्ट-युरोप कॉरिडॉर (IMEC)” पुन्हा सुरू करण्याची इस्रायलची तयारी आहे. israel-expresses-gratitude-to-india “युद्धामुळे काही काळ ही प्रक्रिया थांबली होती, पण आता आम्ही पुढे जाण्यास सज्ज आहोत,” असे ते म्हणाले. पर्यटन, व्यापार आणि कामगार देवाणघेवाणीबाबत बोलताना त्यांनी भारत-इस्रायल दरम्यान थेट विमानसेवा पुन्हा सुरू करण्याची गरज व्यक्त केली, ज्यामुळे दोन्ही देशांतील संबंध आणखी दृढ होतील.

मुलाखतीच्या शेवटी सा’आर यांनी पंतप्रधान मोदी आणि नेतान्याहू यांच्या उघड, सकारात्मक संवादाचे कौतुक केले आणि सांगितले की, “दोघांची पुढील भेट लवकरच होईल अशी आशा आहे.” इस्रायल पुढील वर्षी भारतात होणाऱ्या आर्टिफिशियल इंटेलिजन्स समिटमध्ये वरिष्ठ स्तरावर सहभाग घेणार असल्याचे त्यांनी स्पष्ट केले, ज्यामुळे दोन्ही लोकशाही देशांमधील सहकार्य नव्या युगात प्रवेश करेल.