दिवाळीची परंपरा जागतिक पटलावर...युनेस्कोच्या अमूर्त सांस्कृतिक वारसा यादीत समाविष्ट

Diwali on UNESCO's heritage list भारतातील सर्वात उत्साहाने साजरा होणारा सण दिवाळी आता युनेस्कोच्या अमूर्त सांस्कृतिक वारसा (ICH) यादीत समाविष्ट करण्यात आला आहे. युनेस्कोने दिल्लीत झालेल्या बैठकीत जागतिक स्तरावर या परंपरेला स्थान देण्याचा निर्णय घेतला. युनेस्कोच्या तज्ज्ञांनी जगभरातून आलेल्या ६७ अर्जांवर विचारविमर्श करून दिवाळीला या यादीत स्थान देण्याचा निर्णय घेतला. या सत्राचे उद्घाटन युनेस्कोमधील भारताचे राजदूत विशाल व्ही. शर्मा यांनी केले. सत्रादरम्यान, दिवाळीसारख्या सणांचे सामाजिक, सांस्कृतिक आणि धार्मिक महत्त्व लक्षात घेऊन त्याचे आंतरराष्ट्रीय पातळीवर संरक्षण व प्रसार सुनिश्चित करण्यासाठी यादीत समावेश करण्याचे महत्त्व स्पष्ट केले गेले.

 

 

 

 

 

अमूर्त सांस्कृतिक वारसा यादीमध्ये सण, परंपरा, लोकश्रद्धा, कथाप्रथा आणि लोककला यांचा समावेश होतो. यादीत समावेश झाल्यामुळे दिवाळीची परंपरा जगभर ओळखली जाईल, त्याचा प्रचार-प्रसार वाढेल आणि भविष्यातील पिढ्यांसाठी या सणाचे सांस्कृतिक महत्त्व जपले जाईल. सध्या १५० देशांमधील एकूण ७८८ परंपरा ICH यादीत समाविष्ट आहेत. भारताच्या या यशामुळे दिवाळीच्या उत्सवाला जागतिक स्तरावर मान्यता मिळाली असून, सणाच्या विविध प्रथा आणि समारंभांचे संरक्षण करण्यासाठी अधिक प्रयत्न होणार आहेत. दिवाळीच्या यादीत समावेशामुळे भारताचा सांस्कृतिक वारसा जागतिक पटलावर उजळून दिसणार असून, हा सण आता फक्त देशातील नव्हे तर जागतिक सण म्हणून ओळखला जाईल.