मायक्रोसॉफ्ट भारतात 17.5 अब्ज डॉलर गुंतवणार!

Microsoft's investment in India मायक्रोसॉफ्टने भारतात 2026 ते 2029 या कालावधीत 17.5 अब्ज अमेरिकन डॉलर (सुमारे 1.5 लाख कोटी रुपये) गुंतवण्याची ऐतिहासिक घोषणा केली आहे. ही गुंतवणूक आशियातील कंपनीची आतापर्यंतची सर्वात मोठी आहे. ही रक्कम मुख्यतः भारतातील क्लाउड सेवा, आर्टिफिशियल इंटेलिजन्स (एआय) पायाभूत सुविधा, कौशल्य विकास आणि चालू कामांसाठी वापरली जाणार आहे. जानेवारी 2025 मध्ये जाहीर केलेल्या 3 अब्ज डॉलरच्या गुंतवणुकीव्यतिरिक्त ही नवीन रक्कम आहे.

 

 

 

 

मायक्रोसॉफ्टचे अध्यक्ष आणि मुख्य कार्यकारी अधिकारी सत्या नडेला यांनी पंतप्रधान नरेंद्र मोदी यांची भेट घेतल्यानंतर ही घोषणा केली. नडेला चार दिवसांच्या भारत दौऱ्यावर असून, दिल्ली, बेंगळुरू आणि मुंबईमध्ये विविध कार्यक्रमांमध्ये भाग घेणार आहेत. या गुंतवणुकीचा मुख्य उद्देश भारताला ‘एआय-फर्स्ट’ भविष्यासाठी तयार करणे असून, त्यात स्केल, कौशल्ये आणि सार्वभौम (सॉव्हरेन) क्षमता यांचा समावेश असेल. या गुंतवणुकीतून भारतात सुरक्षित आणि सार्वभौम-तयार हायपरस्केल क्लाउड इन्फ्रास्ट्रक्चर तयार केले जाईल. त्यातील मुख्य केंद्र हैदराबादमधील इंडिया साउथ सेंट्रल क्लाउड रिजन असेल, जे मध्यम 2026 मध्ये सुरू होईल. हा भारतातील मायक्रोसॉफ्टचा सर्वात मोठा हायपरस्केल रिजन असेल, ज्यात तीन उपलब्धता झोन असतील. कंपनीनुसार, हे क्षेत्र दोन ईडन गार्डन्स स्टेडियमच्या आकाराएवढे असेल.

 

ही घोषणा गुगलच्या 15 अब्ज डॉलरच्या गुंतवणुकीनंतर आली आहे. गुगलने ऑक्टोबर 2026 ते 2030 दरम्यान विशाखापट्टणममध्ये एआय हब आणि गिगावॉट-स्केल डेटासेंटरसाठी गुंतवणूक जाहीर केली होती. मायक्रोसॉफ्ट आणि गुगल दोन्ही भारताच्या डिजिटल अर्थव्यवस्थेतील वाढत्या मागणीमुळे मोठ्या प्रमाणात गुंतवणूक करत आहेत. पंतप्रधान नरेंद्र मोदी यांनी ट्विट करत म्हटले की, जेव्हा एआयचा प्रश्न येतो, तेव्हा जग भारताबद्दल आशावादी आहे. भारतात मायक्रोसॉफ्टची आशियातील सर्वात मोठी गुंतवणूक होत असल्याचे पाहून आनंद झाला. भारतातील तरुण या संधीचा उपयोग नवोन्मेषासाठी करतील.”केंद्रीय इलेक्ट्रॉनिक्स आणि माहिती तंत्रज्ञान मंत्री अश्विनी वैष्णव यांनी सांगितले की, ही गुंतवणूक भारताला विश्वास आणि सार्वभौमतेसह नाविन्याच्या दिशेनं घेऊन जाईल. मायक्रोसॉफ्ट भारतातील 22,000 हून अधिक कर्मचाऱ्यांसह बेंगळुरू, हैदराबाद, पुणे, गुरुग्राम आणि नोएडा येथे कार्यरत आहे. कंपनीने श्रम मंत्रालयाच्या ई-श्रम आणि नॅशनल करिअर सर्व्हिस पोर्टलमध्ये प्रगत एआय क्षमता समाकलित करण्याची घोषणा केली आहे, ज्यामुळे 31 कोटींहून अधिक अनौपचारिक कामगारांना लाभ मिळेल.