दिल्लीकरांचा श्वास कोंडला, हवा गुणवत्ता ‘गंभीर’ श्रेणीत

Delhi's air quality राजधानी दिल्लीत प्रदूषणाने पुन्हा एकदा गंभीर पातळी गाठली असून, संपूर्ण शहरावर धुराची जाड चादर पसरल्याचे चित्र शनिवारी सकाळी दिसून आले. दिवसाची सुरुवात धुके आणि धुरकट वातावरणाने झाली. अनेक भागांत विषारी धुराचा थर इतका दाट होता की दृश्यमानता मोठ्या प्रमाणात कमी झाली. रस्त्यांवर नागरिक मास्क लावून फिरताना दिसले, तर दमा आणि श्वसन विकार असलेल्या रुग्णांना मोठ्या अडचणींचा सामना करावा लागला. दिल्लीतील हवेचा गुणवत्ता निर्देशांक म्हणजेच AQI ४०० च्या पुढे पोहोचला असून, ही पातळी ‘गंभीर’ श्रेणीत मोडते.

 

 

 

 

 

सकाळच्या सुमारास एम्स परिसरात धुराचे प्रमाण अधिक असल्याने दृश्यता अत्यंत कमी होती. येथे हवा प्रदूषणामुळे आरोग्यविषयक तक्रारी वाढताना दिसून आल्या. आनंद विहार परिसरातही परिस्थिती तितकीच गंभीर असून, तेथील AQI ४३४ नोंदवण्यात आला आहे. केंद्रीय प्रदूषण नियंत्रण मंडळाच्या मते ही पातळी अत्यंत धोकादायक मानली जाते. आयटीओ परिसरातही विषारी धुराचा जाड थर पसरलेला होता. या भागातील AQI ४१७ इतका नोंदवण्यात आला असून, तोही गंभीर श्रेणीत येतो. अक्षरधाम परिसरात हवा गुणवत्ता निर्देशांक ४१९ इतका होता. संसद मार्ग परिसरातही धुरामुळे दृश्यमानता कमी झाली असून, तेथील AQI ३५६ नोंदवण्यात आला आहे, जो ‘अतिशय खराब’ श्रेणीत मोडतो. या गंभीर परिस्थितीच्या पार्श्वभूमीवर, राष्ट्रीय राजधानी प्रदेश आणि संलग्न भागांतील हवा गुणवत्ता व्यवस्थापन आयोगाने वाहनांमधून होणारे वायू प्रदूषण कमी करण्यासाठी एक विशेष तज्ञ समिती स्थापन केली आहे.

 

 

 

 

या समितीत शिक्षणतज्ज्ञ, आरोग्य तज्ञ, ऑटोमोटिव्ह संशोधन संस्थांचे प्रतिनिधी आणि विविध क्षेत्रांतील जाणकारांचा समावेश आहे. ही समिती ऑटोमोटिव्ह क्षेत्रातील उत्सर्जन नियंत्रणासाठी प्रभावी आणि बहुआयामी उपाययोजनांचा रोडमॅप सुचवणार आहे. दरम्यान, केंद्रीय प्रदूषण नियंत्रण मंडळाने असा अंदाज व्यक्त केला आहे की रविवार आणि सोमवार या दिवशीही दिल्लीतील हवेची गुणवत्ता अत्यंत खराब श्रेणीतच राहण्याची शक्यता आहे. यामुळे श्वसनाच्या आजारांनी त्रस्त असलेल्या नागरिकांना अधिक त्रास होऊ शकतो. डोळ्यांची जळजळ, घसा खवखवणे आणि श्वास घेण्यास अडचण यांसारख्या तक्रारी वाढण्याचीही शक्यता व्यक्त करण्यात आली आहे. शनिवारी दिवसभर दिल्लीतील अनेक भागांत हवा गुणवत्ता गंभीर आणि अतिशय खराब श्रेणीतच राहिल्याने नागरिकांच्या आरोग्याबाबत चिंता वाढली आहे.