इशान किशनच्या नेतृत्वाखाली ऐतिहासिक विजय

Victory under Ishan Kishan's leadership सय्यद मुश्ताक अली ट्रॉफीच्या सुपर लीग टप्प्यात पुण्यातील डीवाय पाटील स्टेडियमवर झारखंडने पंजाबविरुद्ध ऐतिहासिक विजय मिळवला. या टी-२० सामन्यात दोन्ही संघांनी एकत्रितपणे ४३२ धावा केल्या, जे टी-२० क्रिकेटमधील दुर्मिळ कामगिरी मानली जाते. इशान किशनच्या नेतृत्वाखालील झारखंड संघाने फक्त १८.१ षटकांत हे लक्ष्य गाठत चार विकेट्स गमावल्याने सामना एकतर्फी लढतीत बदलला आणि सुपर लीगची सुरुवात विजयाने केली.

 

 

सामन्यात प्रथम फलंदाजी करताना पंजाबने सलील अरोराच्या शतकाच्या जोरावर २० षटकांत सहा बाद २३५ धावा केल्या. अरोराने फक्त ३९ चेंडूत शतक पूर्ण केले आणि ४५ चेंडूत नाबाद १२५ धावा केल्या, ज्यात नऊ चौकार आणि ११ षटकारांचा समावेश होता. मात्र, इतर कोणताही खेळाडू ३० धावांचा टप्पा पार करू शकला नाही. झारखंडकडून सुशांत मिश्रा आणि बाल कृष्णा यांनी प्रत्येकी दोन बळी घेतले.

 

झारखंडने लक्ष्याचा पाठलाग जोरदार सुरू केला. इशान किशनने फक्त २३ चेंडूत ४७ धावा करत संघाला सुरूवातीपासूनच आघाडी दिली. त्यानंतर कुमार कुशाग्राने ४२ चेंडूत नाबाद ८६ धावा करत सामना झारखंडकडून एकतर्फी केला. त्याच्या खेळीत आठ चौकार आणि चार षटकारांचा समावेश होता. अनुकुल रॉयने ३७ धावा आणि पंकज कुमारने ३९ धावा करून संघाला ऐतिहासिक विजय मिळवून दिला. या विजयासह झारखंडने सय्यद मुश्ताक अली ट्रॉफीच्या इतिहासातील सर्वाधिक धावांचा पाठलाग नोंदवला आणि मुंबईने २०२४ मध्ये आंध्र प्रदेशविरुद्ध २३० धावांचे लक्ष्य गाठल्याचा विक्रम मोडला. सामना चाहत्यांसाठी चौकार-षटकारांनी भरलेला रोमांचक सामना ठरला.