नागपूर ही केवळ उपराजधानी नसून 'संघाची जन्मभूमी'

Rashtriya Swayamsevak Sangh हिवाळी अधिवेशनाच्या दरम्यान भाजपा आणि मित्र पक्षाच्या आमदारांनी दरवर्षीप्रमाणे रेशीमबाग येथील राष्ट्रीय स्वयंसेवक संघाच्या स्मृतिमंदिराला आज (रविवारी) भेट दिली. या भेटीदरम्यान मुख्यमंत्री देवेंद्र फडणवीस, उपमुख्यमंत्री एकनाथ शिंदे, तसेच भाजप आणि शिवसेनेचे आमदार उपस्थित होते.

 

 

राष्ट्रीय स्वयंसेवक संघाच्या स्मृतिमंदिराच्या Rashtriya Swayamsevak Sangh दर्शनानंतर, उपमुख्यमंत्री एकनाथ शिंदे यांनी पत्रकारांशी संवाद साधला. शिंदे म्हणाले, "रेशीमबाग येथील प्रत्येक कार्यकर्त्याला येथे राष्ट्रप्रेम आणि देशभक्तीची एक वेगळी अनुभूती मिळते. या ठिकाणाहून समाजसेवा आणि राष्ट्रसेवेची प्रेरणा घेऊन कार्यकर्ते आपल्या कार्यात झपाट्याने समर्पित होतात. संघाच्या कार्याची ही विशेषता आहे की, ते समाजाभिमुख आणि राष्ट्राभिमुख असतात."यावर्षीच्या भेटीदरम्यान, संघाच्या मुख्यालयात पारंपरिक परिचय वर्ग आयोजित केला गेला नाही, कारण वेळेची मर्यादा होती. तथापि, राष्ट्रीय स्वयंसेवक संघाच्या शतकी कार्याचा गौरव करत उपमुख्यमंत्री शिंदे म्हणाले, "हे संघटनात्मक सामर्थ्य वाखाणण्याजोगे आहे. देशभर आणि जगभर संघाच्या शाखा कार्यरत आहेत आणि संघाच्या कार्यकर्त्यांचा निरपेक्ष भावनेने देशसेवेत सहभाग हेच त्याचे मुख्य वैशिष्ट्य आहे."

 

 

पत्रकार परिषदेत शिंदे यांनी संघ संस्थापक डॉ. हेडगेवार यांच्या कार्याचेही कौतुक केले. "शंभर वर्षांपूर्वी डॉ. केशव बळीराम हेडगेवार यांनी नागपूर येथे संघाची स्थापना केली. त्यामुळे नागपूर ही केवळ उपराजधानी नसून संघाची जन्मभूमी आहे. प्रत्येक स्वयंसेवक इथे जात, भाषा आणि प्रांताच्या पलीकडे जाऊन राष्ट्रप्रेमाची शिकवण घेतो आणि देशसेवेत सहभागी होतो," असे शिंदे यांनी सांगितले.

 

 

 

आजच्या भेटीदरम्यान शिवसेनेचे मंत्री, पदाधिकारी आणि कार्यकर्तेही उपस्थित होते. संघाच्या कार्यात सातत्याने दिसणारी समाजाभिमुखता, राष्ट्रप्रेम आणि देशभक्ती या मूल्यांचा गौरव करत शिंदे यांनी संघाच्या कार्यकर्त्यांप्रती अभिमान व्यक्त केला. "शिवसेनेप्रमाणेच संघाचे कार्यकर्तेही संकटाच्या काळात निरपेक्ष भावनेने मदतीसाठी पुढे येतात," असे ते म्हणाले.