मॅडमला प्रेग्नेंट करायचे आहे...

Money offer and cyber scam सायबर फसवणुकीचा एक अत्यंत धक्कादायक आणि हृदयद्रावक प्रकार छत्तीसगडमधून समोर आला आहे. पैशाच्या आमिषाने एका तरुणाला जाळ्यात ओढून सायबर गुन्हेगारांनी त्याचा संपूर्ण आयुष्य उद्ध्वस्त केले आणि अखेर त्या तरुणाने आत्महत्या केली. या घटनेमुळे सायबर गुन्ह्यांचे भयावह वास्तव पुन्हा एकदा समोर आले आहे. छत्तीसगडच्या साक्री भागात राहणारा कामेश्वर निर्मलकर हा तरुण १८ जुलै २०२३ रोजी उस्लापूर आणि घुटकू दरम्यान रेल्वेसमोर उडी मारून आत्महत्या करत असल्याची घटना घडली. मृतदेहाजवळ सापडलेल्या सुसाईड नोटमुळे संपूर्ण प्रकरण उघडकीस आले. कामेश्वरने चिठ्ठीत लिहिले होते की त्याच्या घरच्या पत्त्यावर इंडियन बँकेचे एटीएम कार्ड आले होते, मात्र तो कधीही त्या बँकेत खाते उघडण्यासाठी गेला नव्हता. या संशयास्पद घटनेची माहिती त्याने वडील आणि मित्रांनाही दिली होती.

 

 

 

एटीएम कार्ड मिळाल्यानंतर, लिफाफ्यावर दिलेल्या मोबाईल क्रमांकावर कामेश्वरने संपर्क साधला. खात्याबाबत चौकशी केल्यानंतर त्याला बँकेत जाण्यास सांगण्यात आले. मात्र त्याच रात्री त्याला व्हॉट्सअॅपवरून एक कॉल आला. कॉल करणाऱ्या व्यक्तीने धक्कादायक ऑफर देत सांगितले की तो आपल्या पत्नीला गर्भधारणा करू इच्छितो आणि त्यासाठी मोठी रक्कम देण्यास तयार आहे. पैशाच्या मोहापायी आणि परिस्थिती न समजून घेता कामेश्वरने या ऑफरला होकार दिला. यानंतर सायबर गुन्हेगारांनी त्याला एका ठराविक मोबाईल नंबरशी जोडलेली बँक खाती उघडण्यास भाग पाडले. त्यांच्या सांगण्यानुसार, कामेश्वरने प्रथम पोस्ट ऑफिसमध्ये खाते उघडले आणि पासबुकचा फोटो पाठवला. त्यानंतर नावात चूक असल्याचे कारण देत त्याला पीएनबी बँकेत दुसरे खाते उघडायला लावले. तेथेही पैसे ट्रान्सफर होत नसल्याचा बहाणा करून त्याला कॅनरा बँकेत आणखी एक खाते उघडण्यास सांगण्यात आले. अशा प्रकारे त्याच्या नावावर एकामागून एक अनेक खाती उघडली गेली.

 

 

१४ जुलै रोजी कामेश्वरला बँकेत बोलावण्यात आले. तेथे बँक कर्मचाऱ्यांनी त्याला सांगितले की त्याच्या खात्यांमध्ये मोठ्या प्रमाणावर पैसे जमा होत असून ते लगेच दुसऱ्या खात्यात वळवले जात आहेत. या संशयास्पद व्यवहारांबाबत विचारणा केली असता कामेश्वरकडे कोणतेही स्पष्ट उत्तर नव्हते. आपल्याच नावावर बेकायदेशीर व्यवहार होत असल्याचे लक्षात येताच तो प्रचंड घाबरून गेला. घरी परतल्यानंतर त्याला समजले की आपण सायबर फसवणूक करणाऱ्यांच्या जाळ्यात अडकलो असून अनाहूतपणे गंभीर गुन्ह्यात सहभागी झालो आहोत. बदनामी, पोलिस कारवाई आणि समाजातील अपमानाच्या भीतीने तो मानसिकदृष्ट्या पूर्णपणे खचला. चार दिवस सतत तणावात राहिल्यानंतर अखेर त्याने आत्महत्येचा टोकाचा निर्णय घेतला. या घटनेमुळे सायबर गुन्हेगार किती चलाखपणे सामान्य लोकांना फसवतात आणि त्याचे परिणाम किती भयावह असू शकतात, हे पुन्हा एकदा स्पष्ट झाले आहे. प्रशासन आणि नागरिकांनी अशा आमिषांना बळी न पडता सतर्क राहण्याची गरज असल्याचे या घटनेतून अधोरेखित झाले आहे.