धंतोली चौकाचे नामकरण मावशी केळकर चौक

Nagpur Municipal Corporation नागपूर महानगरपालिकेच्या सौजन्याने आज सकाळी ९:३० वाजता घाट रोड, धंतोली येथील चौकाचे नामकरण "वंदनीय लक्ष्मीबाई उपाख्य मावशी केळकर चौक" असे करण्यात आले. महानगरपालिकेचे लक्ष्मी नगर झोनचे असिस्टंट कमिशनर धनंजय जाधव तसेच राष्ट्र सेविका समितीच्या अखिल भारतीय सहकार्यवाहिका चित्रा जोशी यांच्या हस्ते नामकरण झाले. यावेळी राष्ट्रीय स्वयंसेवक संघाचे महानगर संघचालक राजेश लोया, माजी नगरसेवक संजय बंगाले, समितीच्या अखिल भारतीय कार्यालय प्रमुख पूनम गुप्ता आणि गणमान्य बंधू भगिनी उपस्थित होते.

 

 

याप्रसंगी बोलताना चित्रा जोशी यांनी चौकाचे नामकरण वंदनीय मावशी केळकर यांच्या नावाने करणे सुसंगत असल्याचे सांगितले. राष्ट्र सेविका समितीचे पहिले कार्यालय नाशिकला राणी लक्ष्मीबाई यांच्या नावाने सुरु झाले. त्यानंतर केंद्र कार्यालयाचा विषय आल्यावर वं. मावशींनी नागपूर येथे, धंतोली सारख्या मध्यवर्ती ठिकाणी आणि कर्तृत्वशालिनी अहिल्या देवी होळकर यांच्या नावे करण्याचा विचार मांडला होता. Nagpur Municipal Corporation मावशी केळकर यांचा बरेच वर्ष निवास हा धंतोली येथेच असल्यामुळे धंतोलीतीलच एका चौकाला मावशी केळकरांचे नाव द्यावे अशी मनिषा होती, ती महानगर पालिकेने पूर्ण केल्या बद्दल त्यांचे आभार मानले. २०२५-२६ मध्ये राष्ट्र सेविका समितीच्या कार्याला ९० वर्ष होत आहेत. या वर्षात असा कार्यक्रम होणं हा सुंदर योगच म्हणावा लागेल, असेही त्या म्हणाल्या. कार्यक्रमाचे प्रास्ताविक आणि परिचय महानगर सह संपर्कप्रमुख अर्चिता पांडे यांनी केले.अहल्याबाई स्मारक समितीच्या अध्यक्ष  करुणा साठे यांनी आभार व्यक्त केले.