दहशतवाद्याची आई म्हणाली...'सर्वांना माझ्यासारखा मुलगा हवा'

Sydney terrorist's mother ऑस्ट्रेलियातील सिडनी शहरातील बोंडी बीच परिसरात ज्यू समुदायाच्या हनुक्का उत्सवाच्या तयारीदरम्यान झालेल्या भीषण गोळीबारानंतर हल्लेखोराच्या आईने केलेल्या विधानामुळे खळबळ उडाली आहे. 'सर्वांनाच माझ्यासारखा मुलगा हवा असेल,' असे ती म्हणाली असून या हल्ल्यात किमान १५ जणांचा मृत्यू झाला आहे. या प्रकरणाचा तपास सध्या वेगाने सुरू आहे. रविवारी बोंडी बीचजवळ मोठ्या संख्येने लोक उपस्थित असताना अचानक गोळीबार सुरू झाला. प्राथमिक तपासात हे स्पष्ट झाले की हल्ला करणारे दोघे वडील आणि मुलगा होते. कडक बंदूक नियंत्रण कायदे असलेल्या ऑस्ट्रेलियात जवळपास तीन दशकांतील ही सर्वात प्राणघातक गोळीबाराची घटना मानली जात आहे. या घटनेनंतर संपूर्ण देशात तीव्र संताप व्यक्त केला जात आहे.

 

 

 

 

 

न्यू साउथ वेल्सचे पोलिस आयुक्त मेल लॅनियन यांनी दिलेल्या माहितीनुसार, ५० वर्षीय साजिद अक्रम याला पोलिसांनी घटनास्थळी गोळी घालून ठार केले, तर त्याचा २४ वर्षीय मुलगा नवीद अक्रम गंभीर जखमी झाला असून त्याच्यावर रुग्णालयात उपचार सुरू आहेत. स्थानिक माध्यमांच्या वृत्तानुसार, तपासात सहभागी असलेल्या अमेरिकन गुप्तचर अधिकाऱ्यांनी दोघेही पाकिस्तानी नागरिक असल्याचे सांगितले आहे. साजिद अक्रमच्या न्यू साउथ वेल्समधील ड्रायव्हिंग लायसन्सचा फोटोही सोशल मीडियावर मोठ्या प्रमाणात व्हायरल होत आहे. या हल्ल्यानंतर पोलिसांनी नवीदची आई व्हेरेना हिचीही चौकशी केली आहे. तिने आपल्या मुलाविषयी बोलताना तो असे कृत्य करूच शकत नाही, असा दावा केला. तिच्या म्हणण्यानुसार, नवीदने नुकतीच गवंडीची नोकरी गमावली होती आणि हल्ल्याच्या काही तास आधीच तो कुटुंबाशी शेवटचा संवाद साधत होता.

 

 

व्हेरेनाने सांगितले की रविवारी नवीदने तिला फोन करून आपण पोहायला आणि स्कूबा डायव्हिंगला गेलो असल्याचे सांगितले होते. तो कुटुंबासोबत जेवण करण्याची योजना करत असल्याचेही त्याने सांगितले होते. उष्णतेमुळे घरीच राहण्याचा विचार असल्याचेही त्याने नमूद केले होते. त्यामुळे आपला मुलगा इतका भयानक हल्ला करू शकतो, यावर विश्वास बसत नसल्याचे ती म्हणाली. नवीद खूप चांगला मुलगा होता आणि कोणालाही असा मुलगा हवा असेल, असे भावनिक विधान तिने केले. दरम्यान, प्रत्यक्षदर्शींनी सांगितले की सिडनीचा प्रसिद्ध बोंडी बीच त्या दिवशी गर्दीने फुललेला होता. हल्लेखोरांनी सुमारे दहा मिनिटे सातत्याने गोळीबार केला. या दरम्यान शेकडो लोक जीव वाचवण्यासाठी समुद्रकिनाऱ्यावर आणि आसपासच्या रस्त्यांवर पळताना दिसत होते. पोलिसांच्या माहितीनुसार, समुद्रकिनाऱ्याजवळील एका छोट्या उद्यानात आयोजित करण्यात आलेल्या हनुक्का कार्यक्रमासाठी सुमारे एक हजार लोक उपस्थित होते. या घटनेने संपूर्ण ऑस्ट्रेलियाला हादरवून सोडले असून सुरक्षेच्या मुद्द्यावर पुन्हा एकदा गंभीर चर्चा सुरू झाली आहे.