स्मृती मानधनाचा आयसीसी रँकिंगमध्ये पुन्हा बोलबाला!

Smriti Mandhana : भारतीय महिला क्रिकेट संघाची स्टार फलंदाज स्मृती मानधना पुन्हा एकदा जगातील नंबर वन वन वनडे फलंदाज बनली आहे. आयसीसी महिला एकदिवसीय क्रमवारीत, मानधना दक्षिण आफ्रिकेची कर्णधार लॉरा वोल्वार्ड्टला मागे टाकत अव्वल स्थानावर पोहोचली आहे. या आठवड्यात स्मृती मानधना हिचे रेटिंग ८११ गुणांवर राहिले आहे, तर वोल्वार्ड्ट हिचे रेटिंग ८१४ वरून ८०६ वर घसरले आहे. या बदलामुळे मानधना हिला एकदिवसीय फलंदाजांच्या क्रमवारीत पुन्हा अव्वल स्थान मिळवता आले आहे. पहिल्या दोन स्थानांव्यतिरिक्त, टॉप १० रँकिंगमध्ये कोणताही बदल झालेला नाही.

 

 

 

 

 

टॉप १० फलंदाजांमध्ये, अ‍ॅशले गार्डनर आणि नॅट सायव्हर-ब्रंट अनुक्रमे तिसऱ्या आणि चौथ्या स्थानावर आहेत. बेथ मूनी पाचव्या स्थानावर आहे. एलिसा हीली सहाव्या स्थानावर आहे आणि सोफी डेव्हिन आणि एलिस पेरी संयुक्तपणे सातव्या स्थानावर आहेत. हेली मॅथ्यूज नवव्या स्थानावर आहे. भारताची जेमिमा रॉड्रिग्ज ही टॉप १० फलंदाजांमध्ये समाविष्ट होणारी दुसरी भारतीय आहे. ती १० व्या स्थानावर आहे.

 

 

ताज्या एकदिवसीय क्रमवारीत दक्षिण आफ्रिकेच्या आणि आयर्लंडच्या अनेक खेळाडूंमध्येही लक्षणीय वाढ झाली आहे. पूर्व लंडनमध्ये खेळल्या गेलेल्या मालिकेतील पहिल्या एकदिवसीय सामन्यात दक्षिण आफ्रिकेने आयर्लंडचा ७ विकेट्सने पराभव केला. २१० धावांच्या लक्ष्याचा पाठलाग करताना दक्षिण आफ्रिकेच्या संघाने फक्त ३७ षटकांत विजय मिळवला. सुन लुस आणि मियाने स्मित यांनी अर्धशतके झळकावून संघाच्या विजयात महत्त्वाची भूमिका बजावली. या कामगिरीनंतर सुन लुसने एकदिवसीय फलंदाजी क्रमवारीत पाच स्थानांची झेप घेतली आणि संयुक्तपणे ३१ व्या स्थानावर पोहोचली. दुसरीकडे, लॉरा वोल्वार्ड या सामन्यात केवळ ३१ धावा करू शकली, ज्यामुळे तिच्या क्रमवारीवर परिणाम झाला आणि ती अव्वल स्थानावरून घसरली.

 

 

अष्टपैलू खेळाडूंच्या क्रमवारीतही बदल झाले आहेत. सुन लुसने १० स्थानांनी झेप घेऊन ३३ व्या स्थानावर पोहोचली. आयर्लंडची ओर्ला प्रेंडरगास्ट एका स्थानाने १० व्या स्थानावर पोहोचली, तर लॉरा डेलानी तीन स्थानांनी संयुक्तपणे १६ व्या स्थानावर पोहोचली. गोलंदाजांच्या क्रमवारीत ओर्ला प्रेंडरगास्टनेही सुधारणा केली आणि दोन स्थानांनी प्रगती करत ३४ व्या स्थानावर पोहोचली.