गर्भधारणेदरम्यान प्रदूषणाचा बाळावर गंभीर परिणाम

The effects of pollution during pregnancy दिल्ली-एनसीआरमध्ये वाढत चाललेल्या प्रदूषणामुळे गर्भधारणेदरम्यान महिलांनी अधिक काळजी घेणे आवश्यक आहे. प्रदूषण केवळ फुफ्फुसांवरच नाही, तर संपूर्ण आरोग्यावर आणि विशेषतः गर्भातील बाळावरही गंभीर परिणाम करू शकते. अनेक अभ्यासांनी असे दाखवले आहे की, गर्भधारणेदरम्यान आई ज्या वातावरणात राहते, त्याचा थेट बाळाच्या शारीरिक आणि मानसिक विकासावर प्रभाव पडतो. तज्ज्ञानुसार जर गर्भवती महिला प्रदूषित हवेत राहते, तर हानिकारक कण आणि विषारी पदार्थ तिच्या फुफ्फुसांमधून रक्तात शोषले जातात. हे रक्त प्लेसेंटाद्वारे बाळापर्यंत पोहोचते, ज्यामुळे बाळाच्या विकासावर प्रतिकूल परिणाम होतो. प्रदूषणामुळे अकाली प्रसूती, कमी जन्मवजन आणि गर्भपाताचा धोका वाढतो. तसेच बाळाच्या फुफ्फुसांचा आणि मेंदूचा विकास बाधित होऊ शकतो, ज्यामुळे जन्मानंतर दमा, ऍलर्जी आणि इतर आजारांचा धोका वाढतो.

 

 

फक्त वायू प्रदूषणच नव्हे, तर प्रदूषित पाणी आणि ध्वनी प्रदूषणदेखील बाळाच्या आरोग्यावर परिणाम करतात. प्रदूषित पाण्यातील जीवाणू आणि कीटकनाशके गर्भवती महिला आणि बाळासाठी हानिकारक ठरतात. तसेच जास्त आवाजामुळे आईचा रक्तदाब वाढतो आणि तणाव निर्माण होतो, ज्याचा बाळावरही परिणाम होतो. गर्भधारणेदरम्यान प्रदूषणापासून बाळाचे रक्षण करण्यासाठी काही उपाय आहेत. शक्य तितके घरात राहणे, बाहेर जाणे टाळणे, घरातील हवा शुद्ध करणारी उपकरणे वापरणे, झाडे लावणे आणि N95 मास्कचा वापर करणे याचा समावेश आहे. तसेच स्वच्छ, कोमट पाणी प्यावे आणि आहारात पौष्टिक पदार्थ व व्हिटॅमिन सी समृद्ध आहार समाविष्ट करावा. आयुर्वेदानुसार गरोदरपणात मन शांत ठेवणे आणि वातावरण स्वच्छ ठेवणे अत्यंत महत्त्वाचे आहे, ज्यामुळे बाळाचा योग्य विकास होतो आणि तणाव कमी होतो.