अंतर वाढल्यानंतर बदलले सूर...ट्रम्प म्हणाले...भारत अद्भुत देश!

Trump said India is a wonderful country अमेरिका आणि भारतातील संबंधांमध्ये पुन्हा एकदा सकारात्मक संकेत दिसू लागले आहेत. अमेरिकेचे राष्ट्राध्यक्ष डोनाल्ड ट्रम्प यांनी पंतप्रधान नरेंद्र मोदी यांचे जाहीरपणे कौतुक करत त्यांना “महान मित्र” असे संबोधले आहे. भारत हा इंडो-पॅसिफिक क्षेत्रात अमेरिकेसाठी अत्यंत महत्त्वाचा धोरणात्मक भागीदार असल्याचेही ट्रम्प यांनी स्पष्ट केले आहे. भारतातील अमेरिकन दूतावासाने ही माहिती सोशल मीडिया प्लॅटफॉर्म ‘एक्स’वर शेअर केली. दूतावासाने केलेल्या पोस्टमध्ये ट्रम्प यांनी भारताचे वर्णन जगातील सर्वात प्राचीन संस्कृतींपैकी एका संस्कृतीचे घर असे केले आहे. भारत हा अद्भुत देश असून इंडो-पॅसिफिकमध्ये अमेरिकेचा महत्त्वाचा सहकारी आहे, तसेच पंतप्रधान मोदी हे अमेरिकेचे चांगले मित्र असल्याचे त्यांनी म्हटले आहे. या वक्तव्याच्या काही दिवस आधीच ट्रम्प आणि पंतप्रधान मोदी यांच्यात दूरध्वनीवर चर्चा झाली होती. या संभाषणात दोन्ही नेत्यांनी भारत-अमेरिका आर्थिक भागीदारी अधिक मजबूत करण्यावर भर दिला. भारतीय आणि अमेरिकन वाटाघाटीकर्त्यांनी प्रस्तावित द्विपक्षीय व्यापार करारावर दोन दिवस चर्चा पूर्ण केल्यानंतर ही फोनवरची चर्चा झाली होती.

 

 

 

 

 

या प्रस्तावित व्यापार करारामुळे अमेरिकेने भारतीय वस्तूंवर लादलेले वाढीव आयात शुल्क कमी होण्याची शक्यता व्यक्त केली जात आहे. ऑगस्ट महिन्यात अमेरिकेने भारतीय उत्पादनांवरील शुल्क ५० टक्क्यांपर्यंत वाढवले होते. यामध्ये रशियन कच्च्या तेलाच्या खरेदीवर लादलेले अतिरिक्त २५ टक्के शुल्कही समाविष्ट होते. या निर्णयामुळे दोन्ही देशांतील संबंधांमध्ये तणाव निर्माण झाला होता. पंतप्रधान नरेंद्र मोदी यांनी या दूरध्वनी संभाषणाचे वर्णन सौहार्दपूर्ण आणि सकारात्मक असे केले. त्यांनी सांगितले की, द्विपक्षीय संबंधांमधील प्रगतीचा आढावा घेण्यात आला असून प्रादेशिक आणि आंतरराष्ट्रीय मुद्द्यांवर सविस्तर चर्चा झाली. भारत आणि अमेरिका जागतिक शांतता, स्थैर्य आणि समृद्धीसाठी एकत्र काम करत राहतील, असेही त्यांनी नमूद केले. मात्र, त्यांनी आपल्या निवेदनात व्यापार कराराचा थेट उल्लेख टाळला.

 

 

ऑगस्टमधील शुल्कवाढीनंतर नवी दिल्ली आणि वॉशिंग्टनमधील संबंध काहीसे तणावपूर्ण झाले होते. भारतावर सातत्याने होत असलेल्या अमेरिकन टीकेमुळेही या संबंधांवर परिणाम झाला होता. मात्र, गेल्या काही आठवड्यांत दोन्ही देशांनी हे संबंध सुधारण्यासाठी प्रयत्न तीव्र केल्याचे दिसून येत आहे. सूत्रांच्या माहितीनुसार, दोन्ही नेत्यांनी भारत-अमेरिका व्यापक जागतिक धोरणात्मक भागीदारीतील प्रगतीचा आढावा घेतला. व्यापार, अत्याधुनिक तंत्रज्ञान, ऊर्जा, संरक्षण आणि सुरक्षा या क्षेत्रांमध्ये सहकार्य वाढवण्यावर दोघांनीही सहमती दर्शवली आहे. समान आव्हानांना सामोरे जाण्यासाठी आणि परस्पर हितसंबंध पुढे नेण्यासाठी एकत्र काम करण्याचा निर्धार या चर्चेत व्यक्त करण्यात आला असून, द्विपक्षीय सहकार्य अधिक मजबूत होत असल्याबद्दल दोन्ही बाजूंनी समाधान व्यक्त करण्यात आले आहे.