विमानतळावर बुमराहने चाहत्याचा फोन हिसकावला...व्हिडिओ व्हायरल

Bumrah snatched the fan's phone. भारतीय क्रिकेट संघाचा वेगवान गोलंदाज जसप्रीत बुमराह सध्या क्रिकेटमधील कामगिरीपेक्षा विमानतळावर घडलेल्या एका घटनेमुळे अधिक चर्चेत आला आहे. सोशल मीडियावर व्हायरल झालेल्या एका व्हिडिओमध्ये बुमराह विमानतळावर एका चाहत्यावर संताप व्यक्त करताना दिसत असून, या घटनेमुळे चाहत्यांमध्ये संमिश्र प्रतिक्रिया उमटत आहेत. ही घटना बुमराह विमानतळावर चेक-इनसाठी रांगेत उभा असताना घडली. एका चाहत्याने कोणतीही परवानगी न घेता अचानक त्याच्याजवळ येत मोबाईल कॅमेऱ्याने सतत व्हिडिओ रेकॉर्ड करायला सुरुवात केली. तो चाहता केवळ चित्रीकरण करत नव्हता, तर बुमराहच्या अगदी जवळ जाऊन त्याच्यासोबत चालण्याचाही प्रयत्न करत होता. सुरुवातीला बुमराहने हातवारे करत आणि शब्दांतून त्याला थांबवण्याचा प्रयत्न केला.

 

 

 

व्हायरल व्हिडिओमध्ये दोघांमधील संवादही ऐकू येतो. बुमराह चाहत्याला स्पष्टपणे सांगतो की फोन पडल्यास त्याची जबाबदारी तो घेणार नाही. तरीही चाहता ऐकण्याच्या मनःस्थितीत नसल्याने चित्रीकरण सुरूच ठेवतो. अखेर संयम सुटल्यावर बुमराहने चाहत्याचा मोबाईल फोन हातातून घेतला. हा क्षण कॅमेऱ्यात कैद झाला आणि काही वेळातच तो व्हिडिओ सोशल मीडियावर मोठ्या प्रमाणात व्हायरल झाला. या घटनेनंतर सोशल मीडियावर जोरदार चर्चा सुरू झाली आहे. काही जणांनी बुमराहने अधिक संयम दाखवायला हवा होता, असे मत व्यक्त केले आहे. मात्र, मोठ्या संख्येने चाहते आणि क्रिकेटप्रेमींनी बुमराहची बाजू घेतली असून प्रत्येक खेळाडूला वैयक्तिक जागेचा अधिकार असतो आणि परवानगीशिवाय इतक्या जवळून व्हिडिओ बनवणे चुकीचे असल्याचे त्यांनी म्हटले आहे.