दाट धुक्याचा फटका; दिल्लीसह उत्तर भारतात उड्डाणे रद्द

Flights cancelled to Delhi दिल्लीसह उत्तर भारतातील अनेक भागांत दाट धुके आणि अत्यंत कमी दृश्यमानतेमुळे विमान वाहतूक मोठ्या प्रमाणावर विस्कळीत झाली आहे. या पार्श्वभूमीवर नागरी विमान वाहतूक मंत्रालयासह एअर इंडिया, इंडिगो आणि इतर विमान कंपन्यांनी प्रवाशांसाठी प्रवास सूचना जारी केल्या आहेत. हवामानाच्या प्रतिकूल परिस्थितीमुळे उड्डाणांना विलंब होण्यासह काही उड्डाणे रद्द होण्याची शक्यता असल्याचा इशारा देण्यात आला आहे. दिल्लीच्या इंदिरा गांधी आंतरराष्ट्रीय विमानतळ प्रशासनानेही प्रवाशांना सतर्क राहण्याचे आवाहन केले असून, आपल्या संबंधित विमान कंपनीशी सतत संपर्कात राहण्याचा सल्ला दिला आहे. अधिकृत प्लॅटफॉर्मवरून उड्डाणांची स्थिती तपासावी आणि प्रवासासाठी अतिरिक्त वेळ राखून ठेवावा, असे सांगण्यात आले आहे. प्रवाशांच्या मदतीसाठी विमानतळावर विशेष सुविधा पथके तैनात करण्यात आली आहेत.

 

 

 

 

दरम्यान, शुक्रवारी स्पाइसजेटची दिल्लीहून अहमदाबादला जाणारी एक उड्डाण रद्द करण्यात आल्याने विमानतळावर गोंधळाचे वातावरण निर्माण झाले. स्पाइसजेटने खराब हवामानामुळे ही उड्डाण रद्द करावी लागल्याचे स्पष्ट केले. १८ डिसेंबर रोजीची एसजी ८१९३ ही उड्डाणे दिल्लीतील हवामानामुळे रद्द करण्यात आल्याचे कंपनीने सांगितले आणि प्रवाशांची गैरसोय झाल्याबद्दल दिलगिरी व्यक्त केली. पर्यायी उड्डाण पुन्हा बुक करण्याचा पर्याय उपलब्ध करून देण्यात आल्याचेही नमूद करण्यात आले. प्रत्यक्षात मात्र, दिल्लीतील टर्मिनल ३ वर प्रवाशांचा संताप पाहायला मिळाला. प्रवाशांच्या म्हणण्यानुसार, रात्री १० वाजताची असलेली उड्डाणे आधी पहाटे २ वाजेपर्यंत पुढे ढकलण्यात आली. त्यानंतर प्रवाशांना दोन तास विमानातच बसवून ठेवण्यात आले आणि अखेर पहाटे ४ वाजता उड्डाण रद्द करण्यात आली. पर्यायी व्यवस्था किंवा राहण्याची कोणतीही मदत देण्यात आली नाही, तसेच परतफेड कधी मिळणार याबाबतही स्पष्ट माहिती देण्यात आलेली नाही, असा आरोप प्रवाशांनी केला.