अंबरनाथमध्ये २०८ बोगस मतदारांचा शिरकाव...चौकशी सुरू

ambernath bogus voting अंबरनाथमध्ये नगरपरिषदेच्या निवडणुकीदरम्यान धक्कादायक घटना घडली आहे. कोहोजगाव परिसरात एका सभागृहात मोठ्या प्रमाणात महिला आणि पुरुष जमा झाले होते, ज्यांच्यावर बोगस मतदान करण्याचा आरोप करण्यात आला आहे. या संदर्भात भाजप आणि काँग्रेस कार्यकर्त्यांनी घटनास्थळी पोहोचून हंगामा सुरू केला. पोलिसांनी तातडीने हस्तक्षेप करून सभागृहातील लोकांना बाहेर काढले. माहिती मिळाल्याप्रमाणे, एकूण २०८ महिला आणि मुलं या ठिकाणी जमा झाली होत्या आणि सर्व लोक भिवंडी येथून आले होते. या लोकांचा या ठिकाणी उपस्थित राहण्याचा नेमका हेतू काय होता, याची चौकशी सुरू आहे. अंबरनाथ पोलिसांनी फिरती पथकाकडून तपास सुरू केला असून लवकरच अधिक माहिती समोर येईल अशी माहिती दिली आहे.

 

 

 

या पार्श्वभूमीवर, अंबरनाथ नगरपालिकेसाठी मतदान सुरू असताना शहरातील प्रभाग क्रमांक २८ मध्ये दोन जणांना पैसे वाटप करताना रंगेहाथ पकडले गेले. या प्रकरणात राष्ट्रवादी काँग्रेसच्या अजित पवार गटाच्या कार्यकर्त्यांनी ही व्यक्ती भरारी पथकाच्या ताब्यात दिली. भाजपच्या उमेदवाराकडून पैसे वाटप केल्याचा आरोप या घटनेत करण्यात आला आहे. पोलिस घटनास्थळी दाखल झाले असून या प्रकरणाची पुढील कारवाई सुरू आहे. या सर्व घटनांमुळे अंबरनाथमध्ये निवडणूक काळातच वातावरण तणावपूर्ण झाले आहे, आणि या बोगस मतदानासंदर्भातील प्रकरणाने स्थानिक राजकीय वादांना नवीन वळण दिले आहे.