भाऊसाहेब राष्ट्रानिमिर्तीतले ‘नेशन बिल्डर’
-मुख्यमंत्री फडणवीस यांचे प्रतिपादन -डॉ. पंजाबराव देशमुख स्मृती पुरस्काराने गौरव
Total Views |
अमरावती,
Devendra Fadnavis : स्वातंत्र्यानंतर राष्ट्रानिमिर्तीत सातत्याने योगदान देणार्यापैकी शिक्षणमहर्षी कृषिरत्न डॉ. पंजाबराव देशमुख हे एक ‘नेशन बिल्डर’ असून ‘फूड फॉर ऑल’ची मुहूर्तमेढ भाऊसाहेबांनी रोवली आहे. त्यामुळे भाऊसाहेबांनी दाखविलेल्या शाश्वत मार्गाने चालण्याचाच आमचा प्रयत्न आहे, असे प्रतिपादन मुख्यमंत्री देवेंद्र फडणवीस यांनी केले.
श्री शिवाजी शिक्षण संस्थेच्या वतीने श्री शिवाजी शारीरिक शिक्षण महाविद्यालयाच्या भव्य परिसरात भाऊसाहेबांच्या १२७ व्या जयंतीनिमित्त शनिवारी आयोजित मुख्य समारंभात ते बोलत होते. संस्थेचे अध्यक्ष हर्षवर्धन देशमुख हे कार्यक्रमाच्या अध्यक्षस्थानी होते तर पद्मभूषण डॉ. विजय भटकर हे मुख्य अतिथी म्हणून उपस्थित होते. केंद्रीय आयुष मंत्री प्रताप जाधव, आदिवासी विकास मंत्री डॉ. अशोक उईके, शालेय शिक्षण राज्यमंत्री पंकज भोयर, खासदार डॉ.अनिल बोंडे, खासदार बळवंत वानखडे, आमदार सुलभा खोडके, आ.परिणय फुके, आ. संजय कुटे, आ. प्रताप अडसड, आ. राजेश वानखडे, आ. प्रवीण तायडे, आ. उमेश यावलकर, माजी राज्यमंत्री प्रवीण पोटे यावेळी अतिथी म्हणून हजर होते.
//पुरस्कार अधिक महत्त्वाचा
कार्यक्रमात श्री शिवाजी शिक्षण संस्थेतर्फे दिला जाणारा ‘डॉ.पंजाबराव देशमुख स्मृती पुरस्कार’ देवेंद्र फडणवीस यांना पद्मभूषण डॉ. भटकर यांच्या हस्ते देण्यात आला. पाच लक्ष, मानपत्र, स्मृतीचिन्ह, शाल, पुष्पगुच्छ असे या पुरस्काराचे स्वरूप होते. मुख्यमंत्र्यांनी या पुरस्काराची रक्कम संस्थेला भेट दिली. आजपर्यंत मिळालेल्या देशविदेशातील पुरस्कारापेक्षा हा पुरस्कार अधिक महत्त्वाचा असल्याचे फडणवीस सत्काराला उत्तर देताना म्हणाले. आपल्या भाषणातून त्यांनी भाऊसाहेबांच्या कार्याचा समग्र आढावा घेतला. श्री शिवाजी शिक्षण संस्थेच्या सर्वच मागण्या पूर्ण करण्याची ग्वाही त्यांनी दिली. अमरावती येथील शिक्षण विभागाच्या सर्व कार्यालयाला मिळून ‘डॉ.पंजाबराव देशमुख’ यांच्या नावाने एकच प्रशासकीय भवन तयार करता येईल, असेही मुख्यमंत्री म्हणाले.
शिक्षण आणि कृषी या दोन्ही विषयात भाऊसाहेबांच्या विचारांशी बांधिलकी ठेवून संस्था विविध उपक्रम राबवीत आहे असे सांगून कार्यक्रमाचे अध्यक्ष हर्षवर्धन देशमुख यांनी आपल्या प्रास्ताविक व अध्यक्षीय भाषणातून संस्थेच्या कार्याची माहिती दिली. याशिवाय अन्य मान्यवरांची भाषणे झाली. मानपत्राचे वाचन संस्थेचे कार्यकारिणी सदस्य हेमंत काळमेघ यांनी केले. आभार कोषाध्यक्ष दिलीप इंगोले यांनी मानले. कार्यक्रमाला मोठ्या संख्येने नागरिक उपस्थित होते.