गोवा-शिमलाचा मोह संपला; नववर्षासाठी रामनगरी ठरतेय पहिली पसंती!

Ayodhya choice for tourists अयोध्या सध्या भक्ती, श्रद्धा आणि उत्साहाच्या वातावरणात पूर्णपणे न्हाऊन निघाली आहे. नवीन वर्षाच्या स्वागतासाठी देशभरातून आलेल्या रामभक्तांमुळे रामनगरीत प्रचंड गर्दी पाहायला मिळत आहे. मठ, मंदिरे, रस्ते आणि राम मंदिर परिसर भाविकांनी फुलून गेला असून, पाऊल ठेवायलाही जागा उरलेली नाही. भगवान श्रीरामांच्या दर्शनाने नवीन वर्षाची सुरुवात व्हावी, अशी भावना घेऊन लाखो भाविक अयोध्येत दाखल झाले आहेत. राम मंदिरात सुरू असलेल्या प्रतिष्ठा द्वादशी उत्सवामुळे संपूर्ण शहर भक्तीरसात रंगले आहे. पहाटेपासूनच मंदिरात दर्शनासाठी लांबच लांब रांगा लागलेल्या दिसत आहेत. “जय श्रीराम”च्या जयघोषाने अयोध्येचे वातावरण भारावून गेले आहे. भाविक कुटुंबाच्या सुख-समृद्धीसाठी, देशाच्या कल्याणासाठी आणि मनःशांतीसाठी रामलल्लाचे दर्शन घेत आहेत.

 

 

 

अयोध्येत आलेल्या भाविकांचे म्हणणे आहे की नवीन वर्ष साजरे करण्यासाठी गोवा, शिमला किंवा इतर पर्यटनस्थळांपेक्षा रामनगरी अधिक समाधान देणारी आहे. अनेकांनी सांगितले की कोणतेही विशेष नियोजन, आरक्षण किंवा ऐषआराम न करता ते थेट अयोध्येला पोहोचले, कारण रामलल्लाचे दर्शन हाच त्यांच्यासाठी खरा उत्सव आहे. येथे मिळणारी शांतता आणि आनंद इतर कुठेही मिळत नाही, अशी भावना भाविक व्यक्त करत आहेत.

 

 

उत्तर प्रदेशासह दिल्ली, महाराष्ट्र, गुजरात, राजस्थान, बिहार, मध्य प्रदेश आणि दक्षिण भारतातील विविध राज्यांतून भाविक अयोध्येत आले आहेत. काही भाविकांनी सांगितले की त्यांनी आधी वाराणसीला भेट दिली आणि त्यानंतर अयोध्येला आले. कोणताही ठराविक प्लॅन नव्हता, रामानेच बोलावले म्हणून आलो, असे अनेकांचे म्हणणे आहे. गर्दीमुळे रेल्वे आणि रस्ते प्रवास कठीण असला तरी, रामदर्शनाची ओढ सर्व अडचणींवर मात करत असल्याचे चित्र दिसत आहे.

 

तरुण वर्गाचाही अयोध्येकडे मोठा ओढा दिसून येत आहे. अनेक युवकांनी सांगितले की नवीन वर्षाच्या जल्लोषासाठी आता धार्मिक स्थळांकडे वळण्याची मानसिकता वाढत आहे. गुजरातहून आलेल्या भाविकांनी सांगितले की पंतप्रधान नरेंद्र मोदी यांच्या हस्ते राम मंदिर प्राणप्रतिष्ठेनंतर अयोध्येचे स्वरूपच बदलले असून, श्रद्धा आणि संस्कृतीकडे लोकांचा कल वाढला आहे. मंदिराची भव्य रचना, कोरीव काम आणि दिव्य वातावरण पाहण्यासाठीही भाविक मोठ्या संख्येने येत आहेत. एकूणच, नवीन वर्षाच्या पार्श्वभूमीवर अयोध्या केवळ धार्मिक केंद्र न राहता, देशभरातील श्रद्धेचे आणि सांस्कृतिक जागृतीचे केंद्र बनल्याचे स्पष्टपणे दिसून येत आहे.