रोहित पवार हाजीर हो...

Rohit Pawar Nashik Court राष्ट्रवादी काँग्रेस पक्षाचे आमदार रोहित पवार यांना नाशिक जिल्हा सत्र न्यायालयाने ९ डिसेंबरला न्यायालयात हजर राहण्याचे आदेश दिले आहेत. हा आदेश माणिकराव कोकाटे यांनी रोहित पवार यांच्यावर बदनामीचा खटला दाखल केल्यानंतर आला आहे. पावसाळी अधिवेशनादरम्यानचे हे प्रकरण सुरुवात झाले होते. विधान परिषदेत तत्कालीन कृषिमंत्री आणि विद्यमान क्रीडामंत्री असलेल्या माणिकराव कोकाटे यांच्यावर रोहित पवार यांनी मोबाईलवर ‘ऑनलाइन रमी’ खेळत असल्याचा आरोप केला होता. त्यानंतर सोशल मीडियावर त्यांनी एक व्हिडिओ पोस्ट करून कोकाटे यांच्यावर टीका केली होती. व्हिडिओमध्ये कोकाटे हे मोबाईलवर पत्त्यांचा खेळ खेळत असल्याचा दावा होता. या ट्विटनंतर राज्यभरात मोठी राजकीय खळबळ उडाली.

 

 

 

माणिकराव कोकाटे यांनी न्यायालयात दावा केला की व्हिडिओ खोटा आणि दिशाभूल करणारा आहे. या व्हिडिओमुळे त्यांना कृषी खात्याचे मंत्रिपद गमवावे लागले आणि पक्ष तसेच वैयक्तिक प्रतिमेला मोठा धक्का बसला. त्यांनी कोर्टात स्पष्ट केले की, मोबाईलवर ‘जंगली रमी’ जाहिरात बंद करताना १५ ते २० मिनिटे लागली, त्या दरम्यानचा व्हिडिओ रोहित पवार यांच्याकडे कसा पोहोचला, याची चौकशी व्हावी. न्यायालयाने आता थेट आमदार रोहित पवार यांना न्यायालयात हजर राहून आपली बाजू मांडण्याचे निर्देश दिले आहेत. ९ डिसेंबरला न्यायालयात दोन्ही बाजूंकडून काय दावे–प्रतिदावे येतात, याकडे सर्वांचे लक्ष लागले आहे.