यूपीमध्ये आंबेडकरांच्या वारसा रक्षण धोरणाची घोषणा!

Ambedkar's legacy preservation policy in UP महापरिनिर्वाण दिनानिमित्त उत्तर प्रदेशाचे मुख्यमंत्री योगी आदित्यनाथ यांनी डॉ. भीमराव आंबेडकर यांना श्रद्धांजली अर्पिताना राज्यभर त्यांच्या पुतळ्यांचे संरक्षण करण्यासाठी नवीन धोरण राबवण्याची घोषणा केली. मुख्यमंत्री योगी म्हणाले की, राज्यातील ज्या ज्या ठिकाणी आंबेडकरांचे पुतळे बसवले जातील, तेथे सरकार त्यांच्या सुरक्षिततेची हमी देईल. पुतळ्याभोवती भिंती आणि छप्पर बांधून त्यांचे रक्षण केले जाईल, असेही त्यांनी स्पष्ट केले. मुख्यमंत्री योगी यांनी या प्रसंगी काँग्रेसच्या जुन्या धोरणांवरही निशाणा साधला आणि बाबा साहेबांच्या न्याय, समानता आणि बंधुत्वाच्या संदेशाची आठवण करून दिली. ते म्हणाले की, राष्ट्रीय हिताच्या विरोधात असलेल्या कोणत्याही धोरणाला बाबा साहेबांनी स्पष्ट नकार दिला होता.

 

 

 

कार्यक्रमादरम्यान उपमुख्यमंत्री केशव प्रसाद मौर्य, ब्रजेश पाठक आणि मंत्री असीम अरुण उपस्थित होते. उपमुख्यमंत्री मौर्य म्हणाले की, बाबा साहेबांचे संविधान आजही भारताची ताकद आहे आणि मोदी-योगी सरकार त्यांच्या आदर्शांवर आधारित काम करत आहे. ते पुढे म्हणाले की, २०२९ पर्यंत संसद आणि विधानसभेत ३३% महिला असतील, ज्यामुळे बाबा साहेबांचे समानतेचे तत्व अधिक बळकट होईल. ब्रजेश पाठक यांनी बाबासाहेबांनी दलित, ओबीसी आणि वंचित समुदायांचे हक्क सुनिश्चित करण्यासाठी केलेल्या संघर्षाचे स्मरण करून, काँग्रेस आणि समाजवादी पक्षाने त्यांच्या कार्यकाळात आंबेडकरांचे उद्दिष्ट कमजोर करण्याचा प्रयत्न केला असल्याचा आरोप केला. त्यांनी पंतप्रधान मोदींनी बाबासाहेबांशी संबंधित पंचतीर्थ विकसित केले असल्याचे सांगितले आणि केंद्र व राज्य सरकार एकत्रितपणे त्यांच्या स्वप्नांच्या पूर्ततेसाठी काम करत असल्याचे नमूद केले.