प्रसूतीदरम्यान चढवले रक्त, आणि झाला मृत्यू..।

Pandharpur medical negligence पंढरपूरच्या आढीव (ता. पंढरपूर) परिसरात प्रसूतीदरम्यान गंभीर वैद्यकीय निष्काळजीपणाची घटना समोर आली आहे. २५ वर्षीय गर्भवती महिला आरती चव्हाण यांचा मृत्यू चुकीच्या रक्तपुरवठ्यामुळे झाला आहे. या घटनेनंतर शासनाने तात्काळ स्वामी समर्थ ब्लड स्टोरेज सेंटरचे कामकाज बंद करण्याचे आदेश दिले आहेत.

 

 

 

आरती चव्हाण यांना प्रसूतीसाठी मोहिते हॉस्पिटलमध्ये दाखल केले होते. प्रसूतीदरम्यान त्यांना रक्ताची आवश्यकता भासल्याने नातेवाईकांनी स्वामी समर्थ ब्लड स्टोरेज सेंटरमधून रक्त आणले. तथापि, रुग्णाला देण्यापूर्वी आवश्यक असलेली रक्तगट पडताळणी (क्रॉस मॅचिंग) योग्य प्रकारे केली गेली नाही. वैद्यकीय प्रोटोकॉलनुसार, रुग्णाच्या रक्तगटाशी जुळणाऱ्या रक्तातील विसंगती तपासणे बंधनकारक आहे, परंतु ही प्रक्रिया पाळली न गेल्याने आरती चव्हाण यांना ओ निगेटिव्ह रक्त देण्यात आले, जे तिच्या रक्तगटाशी जुळले नाही.

 

घटनेचा गंभीर परिणाम झाला. २ डिसेंबर रोजी सायंकाळी साडेसातच्या सुमारास चुकीचे रक्त दिल्यानंतर काही तासांतच तिच्या मूत्रविसर्जनावाटे रक्तस्राव सुरू झाला. प्रसूतीवेदना वाढल्यामुळे डॉक्टरांनी शस्त्रक्रिया थांबवून तिला सोलापूर येथे हलवण्याचा सल्ला नातेवाईकांना दिला. सोलापूरमध्ये सुरू असलेल्या उपचारांनंतरही तिची प्रकृती सुधारली नाही आणि अखेर तिचा मृत्यू झाला.या घटनेनंतर अन्न व औषध प्रशासनाने त्वरित कारवाई सुरू केली. सोलापूर येथील अधिकाऱ्यांनी मोहिते हॉस्पिटलचे डॉक्टर, कर्मचारी आणि स्वामी समर्थ ब्लड स्टोरेज सेंटरचे प्रमुख यांची निवेदने नोंदवली. तपासात समजले की, स्टोरेज सेंटरमधील एका कर्मचाऱ्याने आपली चूक कबूल केली आहे. इमर्जन्सी असल्याचे कारण देत त्याने फक्त साधी सलाईन टेस्ट केली, पण प्रत्यक्ष रक्ताची विसंगती तपासणारी क्रॉस मॅचिंग प्रक्रिया केली नाही, असे त्याने मान्य केले.

 

 

तपासणी अहवाल पुणे विभागीय आयुक्त जी. डी. हुकरे यांना पाठवण्यात आला. अहवालातील गंभीर त्रुटींवर कारवाई करत त्यांनी स्वामी समर्थ ब्लड स्टोरेज सेंटरचे कामकाज पुढील आदेशापर्यंत थांबवण्याचे आदेश जारी केले. आयुक्तांनी म्हटले आहे की, रुग्णांना दिले जाणारे रक्त योग्य प्रकारे मॅच केले गेले नसल्याचे स्पष्ट आहे आणि ही घटना रुग्णांच्या सुरक्षिततेच्या दृष्टीने अत्यंत गंभीर आहे.या घटनेने पंढरपूर परिसरात खळबळ उडाली असून, वैद्यकीय निष्काळजीपणामुळे एका तरुण जीवाचा बळी गेला आहे. नागरिक आणि आरोग्य व्यावसायिक अशा ब्लड स्टोरेज सेंटरवर कठोर कारवाई करण्याची मागणी करत आहेत.