बिबट्याच्या हल्ल्यात ५ वर्षीय मुलाचा मृत्यू

leopard attack घरासमोरील अंगणात लघुशंकेसाठी गेलेल्या एका पाच वर्षीय चिमुकल्यावर बिबट्याने हल्ला केल्याने त्याचा जागीच मृत्यू झाल्याची घटना आज गुरुवार २५ सप्टेंबर रोजी पहाटे पाच वाजताच्या सुमारास अर्जुनी मोरगाव तालुक्यातील गोठणगाव वनपरिक्षेत्रातील संजयनगर (बंगाली कॅम्प) येथे घडली. वंश प्रकाश मंडळ (५) असे मृत चिमुकल्याचे नाव आहे.

 

 

 

 

 

मिळालेल्या माहितीनुसार वंशचे आई-वडील हे रोजगारासाठी गुजरात येथे गेले असून वंश आपल्या आजीसोबत मुळगाव संजय नगर येथे राहते. दरम्यान, आज, पहाटे पाच वाजताच्या सुमारास लघुशंकेकरिता तो अंगणात गेला असता घराशेजारीच दबा धरून बसलेल्या बिबट्याने अचानक त्याच्यावर हल्ला केला. यावेळी घराच्या दारात उभी असलेल्या वंशाच्या आजीने आरडा-ओरड केली असता बिबट्याने त्याला ओढत जंगल परिसराकडे घेऊन गेला. आवाज ऐकून शेजारच्या लोकांनी जंगलाकडे धाव घेतली. मात्र तोपर्यंत बिबट्याने वंशाच्या नरडीचा घोट घेतला. दरम्यान नागरिकांना पाहून बिबट्या घटनास्थळावरून पळ काढला. वंशला उपचारासाठी केशोरी येथील प्राथमिक आरोग्य केंद्रात नेले असता तेथील डॉक्टरांनी त्याला मृत घोषित केले. घटनेची माहिती वन विभाग गोठणगाव व केशोरी पोलिसांना देण्यात आली.leopard attack विशेष म्हणजे, परिसरात बिबट्या धुमाकूळ घातला असताना वनविभागाकडून अद्यापही त्याचा बंदोबस्त केला नाही. त्यातच आज, ही घटना घडल्याने गावकऱ्यांमध्ये वन विभागाच्या विरोधात कमालीचा रोष आहे.