पोलिस ठाण्यातील व्यवस्थेची मुख्यमंत्र्यांकडून पाहणी

यवतमाळ,

cm inspects police station राज्याचे मुख्यमंत्री देवेंद्र फडणवीस यांनी आपल्या यवतमाळ दौऱ्याच्या सुरुवातीला यवतमाळ शहरातील अवधूतवाडी पोलिस ठाण्याला भेट देऊन तेथील व्यवस्थेची पाहणी केली. यावेळी त्यांच्यासमवेत पालकमंत्री संजय राठोड, आदिवासी विकास मंत्री डॉ. अशोक उईके, माजी राज्यमंत्री मदन येरावार, आमदार राजू तोडसाम, विशेष पोलिस महानिरीक्षक रामनाथ पोकळे, जिल्हाधिकारी विकास मीना, पोलिस अधीक्षक कुमार चिंता, जिल्हा परिषद मुख्य कार्यकारी अधिकारी मंदार पत्की, माजी खासदार रामदास तडस उपस्थित होते.

प्रारंभी पोलिस अधीक्षक कुमार चिंता यांनी रोपटे देऊन मुख्यमंत्र्यांचे स्वागत केले व पोलिस ठाण्याच्या या नवीन इमारतीची माहिती दिली. पूरग्रस्तांच्या मदतीसाठी पोलिस प्रशासनातर्फे 27 लाख 11 हजार 111 रुपयांच्या निधीचा धनादेश यावेळी मुख्यमंत्री फडणवीस यांना सुपूर्द करण्यात आला. मुख्यमंत्र्यांच्या हस्ते पोलिस ठाणे आवारात वृक्षारोपणही करण्यात आले. वीर शहीद जवान पत्नी सुनीता प्रकाश विहीरे यांना मुख्यमंत्र्यांच्या हस्ते जमिनीचा पट्टा वाटप करण्यात आला. जिल्ह्यातील बालगुन्हेगारी, व्यसनाधीनता, अल्पवयीन मुलांमुलींचे हरवल्याचे अधिक प्रमाण यावर उपाययोजना करण्याच्या हेतूने पोलिस अधीक्षक कुमार चिंता यांच्या संकल्पनेतून सुरू करण्यात आलेल्या ‘ऑपरेशन प्रस्थान’ या अभिनव उपक्रमाची यावेळी माहिती देण्यात आली. ‘ऑपरेशन प्रस्थान’चा पहिला टप्पा 21 एप्रिल ते 29 मे 2025 या कालावधीत 1800 मुलींना निवासी शिबिरामध्ये कराटे प्रशिक्षणासह कायदा व आरोग्यविषयक कार्यशाळा तसेच करिअर मार्गदर्शन करण्यात आले. ‘प्रस्थान' चा दुसरा टप्पा 7 जुलै 2025 पासून सुरू करण्यात आला असून त्यामध्ये एकूण 30 हजार युवक-युवतींना प्रशिक्षित करणे हा प्रमुख उद्देश आहे. आतापर्यत एकूण 11 शाळांमध्ये 3800 विद्यार्थ्यांना प्रशिक्षण दिले आहे. ऑपरेशन प्रस्थानच्या दोन भागांमध्ये एकूण 5,700 युवतींना कराटे प्रशिक्षण देण्यात आले. तसेच ‘ऑपरेशन प्रस्थान’ अंतर्गत 3 टप्प्यांमध्ये दुर्गम भागातील आदिवासी आश्रमशाळा व उपविभागातील ग्रामीण भागातील शाळांमध्ये राबविण्यात येणार आहे.cm inspects police station या उपक्रमाची दखल राष्ट्रीय महिला आयोगाने घेतली असून ‘ऑपरेशन प्रस्थान’ ही मोहीम संपूर्ण भारतभर राबविण्यात यावी असे सुचविले आहे. ऑपरेशन प्रस्थान अंतर्गत गणेशोत्सव, दुर्गोत्सव, पूर नियत्रंण, वाहतूक नियमन इत्यादींसाठी युवक-युवतींनी पोलिसांसोबत राहून कामकाज केले. यावेळी मुलींनी कराटे प्रात्यक्षिक सादर केले.