धामणगाव रेल्वे परिसरात सौम्य हादरे

 

dhamangaon-railway-earthquake येथील जुना धामणगाव परिसरात शनिवारी दुपारी जमिनीला सौम्य हादरे बसल्याची घटना समोर आली. या घटनेमुळे नागरिकांमध्ये काही काळ भीतीचे वातावरण निर्माण झाले होते. मात्र, भारतीय भूगर्भशास्त्रीय सर्वेक्षण विभागाच्या अमरावती कार्यालयाने सदर हादरे भूकंपाचे नसल्याचे स्पष्ट केले आहे. जुना धामणगाव हद्दीतील कृष्णा नगर व परिसरात अचानक जमीन हलल्याचा अनुभव काही नागरिकांना आला. dhamangaon-railway-earthquake काहींना घर हलल्यासारखे जाणवले, तर काही ठिकाणी खिडक्या व छपरांना सौम्य हादरे बसल्याचे स्थानिकांनी सांगितले. यामुळे काही नागरिक भीतीपोटी घराबाहेर रस्त्यावर आले. ही कंपने अत्यंत सौम्य स्वरूपाची असल्याने अनेक कामात व्यस्त असलेल्या नागरिकांना ती जाणवली नाहीत.

 

  

 

 

 

मात्र एका जागी बसलेल्या किंवा स्थिर असलेल्या नागरिकांना क्षणभर गलबलून गेल्यासारखे वाटल्याचे सांगण्यात आले. काही सेकंदातच परिस्थिती पूर्ववत झाली. या घटनेत कोणतीही जीवित अथवा वित्तहानी झालेली नाही. दरम्यान, नागरिकांनी भूकंपासारखे धक्के जाणवल्याचे सांगितले असले तरी भारतीय भूगर्भशास्त्रीय सर्वेक्षण विभागाच्या कार्यालयातील सेस्मोग्राफ/सेस्मोमीटर यंत्रांवर भूकंपाची कोणतीही नोंद आढळून आलेली नाही असे तहसीलदार अभय घोरपडे यांनी सांगितले आहे. त्यामुळे हे हादरे भूकंपामुळे झाले नसल्याचे स्पष्ट झाले आहे. स्थानिक पातळीवर काही नागरिकांकडून भूगर्भात सुरू असलेल्या ब्लास्टिंग किंवा इतर मानवी क्रियाकलापांमुळे हे सौम्य हादरे बसले असावेत, असा अंदाज व्यक्त केला जात आहे. मात्र याबाबत अद्याप कोणतीही अधिकृत पुष्टी झालेली नाही. सध्या परिसरात परिस्थिती पूर्णपणे शांत असून कोणताही धोका नसल्याचे प्रशासनाने स्पष्ट केले आहे. नागरिकांनी अफवांवर विश्वास ठेवू नये, असे आवाहन करण्यात आले आहे.

 

 

घरात भूकंपासारख्या हालचाली जाणवल्या. काही सेकंदात पुन्हा सर्व काही सुरळीत झाले. चालत असलेल्या व्यक्तीला जाणवणार नाही, इतक्या सौम्य हालचाली होत्या.

भारतीय भूगर्भशास्त्रीय सर्वेक्षण विभागाच्या जीपीएस व सेस्मोग्राफवर भूकंपाची कोणतीही नोंद झालेली नाही. ही घटना इतर कारणांमुळे घडलेली असू शकते. नागरिकांनी घाबरून जाण्याची आवश्यकता नाही व अफवांवर विश्वास ठेवू नये.