बटन काहीही दाबा, लाईट ‘कमळाची’च! पुण्यात ईव्हीएमनेच वाढवला गोंधळ
Total Views |
पुणे,
PMC Election 2026 : कसबा पेठ विश्रामबाग वाडा क्षेत्रीय कार्यालयाच्या अखत्यारीतील प्रभाग क्रमांक २५ मधील शुक्रवार पेठ येथील शिवाजी मराठा हायस्कूलमधील मतदान केंद्रावर ईव्हीएम मशीनमध्ये तांत्रिक बिघाड झाल्याने मतदान प्रक्रिया सुमारे दीड तास ठप्प राहिली. दुपारी साडेदोनच्या सुमारास हा प्रकार घडल्याने मतदानासाठी आलेल्या नागरिकांमध्ये गोंधळाचे वातावरण निर्माण झाले.
शिवाजी मराठा हायस्कूलमधील खोली क्रमांक ४ मधील ईव्हीएम मशीनमध्ये अडचण आल्याचा दावा एका मतदाराने केल्यानंतर संशय वाढला. संबंधित मतदाराने कोणतेही बटन दाबले तरी ‘कमळ’ चिन्हाची लाईट लागत असल्याचा आरोप केल्याने मतदान केंद्रावर अस्वस्थता पसरली. काही वेळातच विविध पक्षांचे कार्यकर्ते, उमेदवार आणि समर्थक मतदान केंद्रावर जमा झाल्याने वातावरण तणावपूर्ण झाले.
राष्ट्रवादी काँग्रेस (घड्याळ) पक्षाच्या उमेदवार रूपाली ठोंबरे पाटील तसेच महाराष्ट्र नवनिर्माण सेनेचे उमेदवार गणेश भोकरे यांनी घटनास्थळी भेट देत ईव्हीएम मशीन तात्काळ बदलण्याची आणि मतदानाची वेळ वाढवून देण्याची मागणी केली. यावरून काही काळ चर्चा आणि तक्रारी सुरू राहिल्या. मात्र, प्रशासनाकडून कोणतीही अधिकृत तक्रार प्राप्त झालेली नसल्याचे स्पष्ट करण्यात आले.
अखेर दुपारी साडेतीनच्या सुमारास निवडणूक अधिकारी मतदान केंद्रावर दाखल झाले. त्यांनी ईव्हीएम मशीनची तपासणी करून तांत्रिक अडचण दूर केली. त्यानंतर सुमारे पावणेचार वाजता मतदान प्रक्रिया पुन्हा सुरळीत सुरू झाली. दरम्यान, एक ते दीड तास मतदान बंद राहिल्यामुळे मतदारांना लांब रांगेत उभे राहावे लागले. विशेषतः ज्येष्ठ नागरिकांना मोठ्या अडचणींचा सामना करावा लागला.
यासंदर्भात बोलताना पुणे शहराचे पोलिस उपायुक्त कृषिकेश रावले यांनी सांगितले की, मतदान केंद्रावर उमेदवारांना बाहेर काढताना काही क्षण गोंधळ झाला होता. मात्र अतिरिक्त मतदान यंत्र सुरू केल्याने अवघ्या काही मिनिटांत परिस्थिती नियंत्रणात आली. मतदान सध्या सुरळीत सुरू असून विशिष्ट बटनाबाबत किंवा दीड तास गोंधळ झाल्याच्या चर्चा या अफवा असल्याचेही त्यांनी स्पष्ट केले.