लग्न समारंभाला जाणारी बस उलटली; ९ मृत, ८० जखमी

A bus overturned in Jharkhand झारखंडच्या लातेहार जिल्ह्यात महुआदंड पोलिस स्टेशनच्या हद्दीतील ओरसा बांगलाधरा खोऱ्यात एका बसचा अपघात झाला. ही बस छत्तीसगडमधील बलरामपूर जिल्ह्यातून लग्न समारंभाला जात होती. बस उलटल्याने पाच प्रवाशांचा जागीच मृत्यू झाला, ज्यात चार महिला होत्या, तर ८० जण जखमी झाले. लातेहार रुग्णालयात उपचार सुरू असताना आणखी दोन जणांचा मृत्यू झाला, तर गुमला सदर रुग्णालयातही दोन प्रवाशांचा मृत्यू झाला. जखमींपैकी ३२ जण गंभीर प्रकृतीचे असल्यामुळे त्यांना रांची येथील राजेंद्र इन्स्टिट्यूट ऑफ मेडिकल सायन्सेस (रिम्स) येथे पाठवण्यात आले. उर्वरित जखमींना महुआदंड सामुदायिक आरोग्य केंद्र आणि खाजगी रुग्णालयात उपचारासाठी दाखल करण्यात आले आहेत.

 

 

 

मृतांच्या ओळखीमध्ये रेशांती देवी (३५), प्रेमा देवी (३७), सीता देवी (४५), सोनमती देवी (५५), सुखना भुईयान (४०) आणि विजय भुईयान यांचा समावेश आहे. लातेहार रुग्णालयात मृत्युमुखी पडलेल्या इतर प्रवाशांची ओळख पटवण्याचे काम सुरू आहे. बस चालक विकास पाठक यांच्या मते, बसमध्ये सुमारे ९० प्रवासी होते. ब्रेक निकामी झाल्यामुळे हँडब्रेक वापरून आणि इंजिन बंद करून गाडी थांबवण्याचा प्रयत्न केला, पण अखेर बसवर नियंत्रण ठेवता आले नाही आणि ती उलटली. मुख्यमंत्री हेमंत सोरेन यांनी लातेहारच्या उपायुक्तांना जखमींना तत्काळ आणि योग्य वैद्यकीय सेवा देण्याचे निर्देश दिले आहेत. पोलिस आणि प्रशासनाने अपघातस्थळी बचाव आणि तपास कार्य सुरू केले आहे.