पाकिस्तानला गाझा पीस बोर्डात आमंत्रण!

Tensions in Israel have increased. अमेरिकेचे अध्यक्ष डोनाल्ड ट्रम्प यांनी पाकिस्तानला गाझा पीस बोर्डात सामील होण्याचे आमंत्रण दिल्याने मध्यपूर्वेतील राजकारणात नव्या चर्चा सुरू झाल्या आहेत. या निर्णयामुळे इस्रायलचे पंतप्रधान बेंजामिन नेतान्याहू यांचे मन दुखावले गेले असून, इस्रायलचा तणाव वाढल्याचे मानले जात आहे. पाकिस्तान उघडपणे हमासला पाठिंबा देत असल्याने आणि सुरुवातीपासूनच इस्रायलला विरोध करत असल्याने ट्रम्प यांच्या या पावलामुळे इस्रायली नेतृत्वाच्या अडचणी वाढू शकतात, असे राजकीय विश्लेषकांचे मत आहे. पाकिस्तानच्या परराष्ट्र मंत्रालयाने एका निवेदनात सांगितले की पाकिस्तानचे पंतप्रधान शाहबाज शरीफ यांना डोनाल्ड ट्रम्प यांनी गाझा पीस बोर्डात सहभागी होण्याचे औपचारिक आमंत्रण दिले आहे. गाझामध्ये शांतता आणि सुरक्षितता प्रस्थापित करण्यासाठी सुरू असलेल्या आंतरराष्ट्रीय प्रयत्नांमध्ये पाकिस्तान सक्रिय सहभाग घेईल, तसेच संयुक्त राष्ट्रांच्या ठरावांनुसार पॅलेस्टिनी प्रश्नावर कायमस्वरूपी तोडगा काढण्यासाठी प्रयत्न करेल, असेही या निवेदनात नमूद करण्यात आले आहे.

 

 

पाकिस्तानसोबतच ट्रम्प यांनी तुर्कीचे अध्यक्ष रेसेप तय्यिप एर्दोगान आणि इजिप्तचे अध्यक्ष अब्देल फताह अल-सिसी यांनाही या पीस बोर्डात सामील होण्याचे आमंत्रण दिले आहे. तुर्की आणि इजिप्त या दोन्ही देशांनी या आमंत्रणाची पुष्टी केली आहे. प्रस्तावित पीस बोर्ड गाझाच्या तात्पुरत्या प्रशासनावर देखरेख ठेवणार असून, संघर्षानंतरच्या संक्रमण प्रक्रियेत महत्त्वाची भूमिका बजावणार आहे. तुर्कीच्या राष्ट्रपती कार्यालयाने दिलेल्या माहितीनुसार, एर्दोगान यांना ट्रम्प यांच्याकडून पॅनेलमध्ये सामील होण्याचे आमंत्रण देणारे पत्र प्राप्त झाले आहे. दुसरीकडे, इजिप्तच्या परराष्ट्रमंत्र्यांनी पत्रकार परिषदेत सांगितले की या आमंत्रणाचा सध्या अभ्यास करण्यात येत असून, त्यावर योग्य वेळी निर्णय घेतला जाईल.

 

 

दरम्यान, ट्रम्प यांच्या गाझा शांतता योजनेची अंमलबजावणी करण्यासाठी एक कार्यकारी पॅनेल स्थापन करण्यात आल्याची माहिती व्हाईट हाऊसने दिली आहे. या पॅनेलमध्ये अमेरिकेचे परराष्ट्र मंत्री मार्को रुबियो, जागतिक बँकेचे अध्यक्ष अजय बंगा, माजी ब्रिटिश पंतप्रधान टोनी ब्लेअर आणि तुर्कीचे परराष्ट्र मंत्री हकान फिदान यांचा समावेश आहे. हे पॅनेल गाझाच्या प्रशासनापासून ते प्रादेशिक मुत्सद्देगिरी, पुनर्बांधणीसाठी निधी उभारणी आणि गुंतवणूक यासारख्या विविध बाबींवर देखरेख ठेवणार आहे. व्हाईट हाऊसच्या निवेदनानुसार, व्यापक ‘शांतता मंडळ’ गाझामधील संघर्षातून विकासाकडे होणाऱ्या संक्रमणादरम्यान धोरणात्मक मार्गदर्शन आणि जबाबदारी सुनिश्चित करेल. या प्रक्रियेचा भाग म्हणून गाझामध्ये प्रशासन, सुरक्षा आणि पुनर्बांधणीच्या प्रयत्नांचे समन्वय साधण्यासाठी अमेरिकेने आंतरराष्ट्रीय स्थिरीकरण दल तैनात करण्याची तसेच एका उच्च प्रतिनिधीची नियुक्ती करण्याची योजना आखली आहे. ट्रम्प यांच्या या हालचालींमुळे मध्यपूर्वेतील राजकीय समीकरणे अधिक गुंतागुंतीची होण्याची शक्यता वर्तवली जात आहे.