रस्त्यावर सापडले अल्पवयीन मुलाचे कापलेले डोके

severed head of a minor boy बिहारची राजधानी पाटणा येथे सोमवारी रात्री एक धक्कादायक घटना उघडकीस आली असून नाडी पोलिस ठाण्याच्या हद्दीत रस्त्याच्या कडेला एका अल्पवयीन मुलाचे कापलेले डोके सापडले आहे. या भीषण घटनेमुळे परिसरात भीतीचे वातावरण पसरले असून नागरिकांमध्ये तीव्र संताप आणि भीती व्यक्त केली जात आहे. ज्या अवस्थेत मुलाचे कापलेले डोके आढळून आले, त्यावरून हा खून अतिशय निर्दयपणे करण्यात आल्याचा प्राथमिक अंदाज पोलिसांनी व्यक्त केला आहे. घटनेची माहिती मिळताच नाडी पोलिस ठाण्याचे अधिकारी तातडीने घटनास्थळी दाखल झाले आणि परिसर सील करून तपास सुरू केला.

 

 

 

 

जप्त करण्यात आलेले कापलेले डोके पुढील वैद्यकीय तपासणीसाठी नालंदा मेडिकल कॉलेज रुग्णालयात पाठवण्यात आले आहे. अतिरिक्त पोलिस ठाणे प्रमुख विवेक कुमार यांनी सांगितले की, प्राथमिक पाहणीत मुलाची हत्या धारदार शस्त्राने करण्यात आल्याचे संकेत मिळत आहेत. सध्या घटनास्थळाच्या आजूबाजूचा परिसर बारकाईने तपासण्यात येत असून मृतदेहाचा उर्वरित भाग शोधण्यासाठी शोधमोहीम राबवली जात आहे. या घटनेनंतर स्थानिक नागरिकांमध्ये भीतीचे वातावरण असून काही नागरिकांनी या हत्येमागे नरबळीचा संशयही व्यक्त केला आहे. मात्र, पोलिसांनी या बाबत कोणताही निष्कर्ष काढलेला नसून सर्व शक्य दिशांनी तपास सुरू असल्याचे स्पष्ट केले आहे. परिसरातील सीसीटीव्ही कॅमेऱ्यांचे फुटेज तपासण्यासाठी स्वतंत्र पथक नियुक्त करण्यात आले असून मानसिक आजाराचा किंवा गुन्हेगारी पार्श्वभूमीचा कोनही तपासात विचारात घेतला जात आहे.