निवडणुकीपूर्वी बांगलादेशात पुन्हा एका विद्यार्थी नेत्याची हत्या

Student leader murdered in Bangladesh निवडणुकीच्या पार्श्वभूमीवर बांगलादेशातील राजकीय वातावरण अधिकच अस्थिर होत चालले असून राजधानी ढाकामध्ये आणखी एका विद्यार्थी नेत्याची गोळ्या घालून हत्या झाल्याने खळबळ उडाली आहे. अज्ञात हल्लेखोरांनी स्वयंसेवी पक्षाचे माजी नेते अजीजुर रहमान मुसाब्बीर यांच्यावर गोळीबार करून त्यांची निर्घृण हत्या केली. आगामी निवडणुकांपूर्वी सुरू असलेल्या राजकीय हिंसाचारातील ही ताजी घटना मानली जात आहे.

 

 

पोलिसांच्या माहितीनुसार, ढाकामधील कारवान बाजार परिसरात, वर्दळीच्या बसुंधरा सिटी शॉपिंग कॉम्प्लेक्सजवळील एका हॉटेलजवळ मुसाब्बीर यांच्यावर हा हल्ला करण्यात आला. हल्लेखोरांनी अगदी जवळून गोळीबार केला असून मुसाब्बीर यांचा घटनास्थळीच मृत्यू झाला. या गोळीबारात आणखी एक व्यक्ती गंभीर जखमी झाली असून त्याला तातडीने रुग्णालयात दाखल करण्यात आले आहे. सध्या त्याची प्रकृती स्थिर असल्याचे अधिकाऱ्यांनी सांगितले. अजीजुर रहमान मुसाब्बीर हे बांगलादेश नॅशनलिस्ट पार्टीच्या स्वयंसेवी शाखेशी संबंधित होते आणि ढाका मेट्रोपॉलिटन नॉर्थ वॉलंटियर पार्टीचे सरचिटणीस म्हणून त्यांनी काम पाहिले होते. १२ फेब्रुवारीला होणाऱ्या निवडणुकांपूर्वी देशात आदर्श आचारसंहिता लागू असतानाच ही हत्या झाल्याने सुरक्षा व्यवस्थेवर प्रश्नचिन्ह निर्माण झाले आहे.

 

स्थानिक माध्यमांच्या वृत्तानुसार, जखमींना प्रथम बीआरबी रुग्णालयात दाखल करण्यात आले, त्यानंतर पुढील उपचारांसाठी ढाका मेडिकल कॉलेज रुग्णालयात हलवण्यात आले. हल्लेखोरांनी परिसरात अनेक गोळ्या झाडून घटनास्थळावरून पलायन केल्याचे प्राथमिक तपासात स्पष्ट झाले आहे. पोलिसांनी शोधमोहीम सुरू केली असली तरी बुधवारी सकाळपर्यंत कोणालाही अटक करण्यात आलेली नव्हती. दरम्यान, फेब्रुवारी २०२६ मध्ये होणाऱ्या सार्वत्रिक निवडणुकांच्या पार्श्वभूमीवर बांगलादेशात गेल्या काही महिन्यांत राजकीय हिंसाचाराच्या घटनांमध्ये मोठी वाढ झाली आहे. काही दिवसांपूर्वी जुबो दल या युवा संघटनेच्या एका नेत्यावर गोळीबार झाला होता. त्याआधी १२ डिसेंबर २०२५ रोजी इन्कलाब मंचचे प्रमुख नेते शरीफ उस्मान हादी यांचीही गोळ्या घालून हत्या करण्यात आली होती. हादी यांच्या मृत्यूनंतर देशभरात तीव्र निदर्शने आणि हिंसक घटना घडल्या. निवडणुका जवळ येत असताना वाढती हिंसा, सतत होणारे हल्ले आणि ढासळत चाललेली सुरक्षा व्यवस्था यामुळे बांगलादेशातील लोकशाही प्रक्रियेपुढे गंभीर आव्हान उभे राहिले असल्याचे मत अनेक राजकीय विश्लेषक व्यक्त करत आहेत.