वडोदऱ्यात चाहत्यांमध्ये फसला विराट आणि...video

Virat was mobbed by fans. वडोदऱ्याच्या एअरपोर्टवर विराट कोहलीच्या आगमनामुळे चाहत्यांमध्ये गोंधळ आणि उत्साहाचा जोरदार थरार अनुभवायला मिळाला. भारत आणि न्यूझीलंड यांच्यातील पहिला वनडे सामना ११ जानेवारीला वडोदऱ्यात होणार असून, त्यापूर्वीच विराट कोहली विमानतळावर दाखल झाला. चाहत्यांनी त्याचे जल्लोषात स्वागत केले आणि विराटची झलक पाहण्यासाठी गर्दी इतकी मोठी होती की सुरक्षा कर्मचाऱ्यांना त्याला घेरून थेट कारपर्यंत सुरक्षित नेण्याची आवश्यकता भासली. विराट कोहली काळ्या रंगाचा टी-शर्ट आणि काळा चष्मा घालून दिसला.

 

 

चाहत्यांचा उत्साह इतका प्रचंड होता की प्रत्येकजण ‘कोहली-कोहली’च्या घोषणा देत त्याला पाहण्याचा प्रयत्न करत होता. विराटच्या आगमनापूर्वीच अष्टपैलू नितीश कुमार रेड्डी वडोदऱ्यात पोहोचला होता, तर उर्वरित भारतीय खेळाडू लवकरच येथे दाखल होण्याची शक्यता आहे. विराट कोहलीने अलीकडेच विजय हजारे ट्रॉफी २०२५-२६ स्पर्धेत दिल्ली संघासाठी अवघ्या दोन सामन्यांत २०८ धावा केल्या. आंध्र प्रदेशविरुद्ध त्याने दमदार १३१ धावा केल्या तर गुजरातविरुद्ध ७७ धावा जमवल्या. त्याच दरम्यान, त्याने लिस्ट-ए क्रिकेटमध्ये १६ हजार धावांचा टप्पा पार केला आणि सर्वात जलद १६ हजार लिस्ट-ए धावा करणाऱ्या फलंदाजांच्या यादीत सचिन तेंडुलकरलाही मागे टाकले आहे.

 

 

 

ऑस्ट्रेलियाविरुद्धच्या मालिकेत विराट कोहलीने आंतरराष्ट्रीय क्रिकेटमध्ये पुनरागमन केले. पहिल्या दोन सामन्यांत तो शून्यावर बाद झाला असला, तरी त्यानंतरच्या सामन्यांमध्ये त्याच्या बॅटने धावांचा पाऊस पाडला. दक्षिण आफ्रिकेविरुद्धच्या तीन वनडे सामन्यांत त्याने दोन शतके आणि एक अर्धशतकाच्या जोरावर एकूण ३०२ धावा केल्या. विजय हजारे ट्रॉफीतही फक्त दोन सामन्यांत २०८ धावा करून त्याने आपला फॉर्म कायम राखला आहे.

विराट कोहली सध्या आंतरराष्ट्रीय क्रिकेटमध्ये २८ हजार धावांचा टप्पा गाठण्यापासून केवळ २५ धावा दूर आहे. हा टप्पा पार करताच तो सचिन तेंडुलकर आणि कुमार संगकारा यांच्या पाठोपाठ, जगातील तिसरा फलंदाज होईल. न्यूझीलंडविरुद्ध भारताच्या एकदिवसीय संघात शुभमन गिल (कर्णधार), रोहित शर्मा, विराट कोहली, केएल राहुल, श्रेयस अय्यर (उपकर्णधार), वॉशिंग्टन सुंदर, रवींद्र जडेजा, मोहम्मद सिराज, हर्षित राणा, प्रसिद्ध कृष्णा, कुलदीप यादव, ऋषभ पंत, नितीश कुमार रेड्डी, अर्शदीप सिंग आणि यशस्वी जैस्वाल यांचा समावेश आहे. वडोदऱ्यातील एअरपोर्टवरील या थरारक क्षणाचा व्हिडिओ सोशल मीडियावर प्रचंड व्हायरल झाला असून चाहत्यांच्या उत्साहाने विराट कोहलीच्या आगमनाचा अनुभव अधिकच लक्षवेधक केला आहे.