कौटुंबिक वादातून धाकट्या भावाची हत्या

younger-brother-murdered : कौटुंबिक वादातून मोठ्या भावाने धाकटया भावाच्या डोक्यावर वासल्याने जबर वार करून त्याची हत्या केली. ही घटना ही घटना बल्लारपूर तालुक्यातील विसापूर येथे बुधवारी रात्री 9.45 वाजता घडली. विशेष म्हणजे, या हत्याकांडातील पुरावे नष्ट करण्यासाठी मृतकाचा मृतदेह रेल्वे मार्गावर टाकण्यात आला. मृतक भावाचे नाव गणेश विश्वनाथ भोयर (25, रा. इंदिरा नगर वॉर्ड, विसापूर, ता. बल्लारपूर) असे आहे. या प्रकरणी आरोपी मोठा भाऊ गुरूदास विश्वनाथ भोयर (27 ), वडील विश्वनाथ झुंगा भोयर (71) व आई कौशल्या विश्वनाथ भोयर (55) यांना बल्लारपूर पोलिसांनी ताब्यात घेतले आहे.

 

 

 

 

विश्वनाथ भोयर यांची कौशल्या ही दुसरी पत्नी आहे. त्यांना पहिल्या पत्नीचे दोन मुले व दुसर्‍या पत्नीचे दोन मुले आहे. यातील पहिल्या पत्नीचे दोन्ही मुले वेगवेगळे राहत आहे. मात्र विश्वनाथ, कौशल्या, गुरूदास व गणेश एकत्र राहत होते. बुधवारी रात्री गणेश व गुरूदास या भावंडांत दारू पिऊन भांडण झाले. भांडणादरम्यान वाद विकोपाला गेला. रागाच्या भरात गुरूदासने गणेशच्या डोक्यावर लोखंडी वासल्याने जबरदस्त प्रहार केला. यात गणेशचा जागीच मृत्यू झाला.

 

 

घटनेनंतर आरोपींनी मध्यरात्री 12 ते 1 वाजता दरम्यान खुनातील पुरावे नष्ट करायची योजना आखली. गुरूदास भोयर याने मृतक गणेशच्या पायाला दोरी बांधून गोंदिया-बल्लारपूर रेल्वे मार्गावर ओढत नेले. हा प्रकार रात्री गस्तीवर असलेल्या रेल्वे कर्मचारी दामाजी नरोटे यांच्या लक्षात आला. त्याने या घटनेची माहिती रेल्वे पोलिसांना दिली. रेल्वे पोलिसांनी बल्लारपूर ठाण्याच्या पोलिसासोबत संपर्क साधून घटनेबाबत अवगत केले. घटनेचे गांभीर्य ओळखून बल्लारपूर पोलिसांनी सकाळी डाग स्कॉड पाचारण करून हत्याकांडातील माग काढला. त्यावेळी पोलिसांना जबर धक्का बसला. ज्या ठिकाणी गणेश हा रक्ताच्या थारोळ्यात पडला होता. ती जागा सारवण करून स्वच्छ करण्यात आल्याचा प्रकार उघडकीस आला. संगनमत करून आई, वडील व मोठ्या भावाने धाकट्याच्या काटा काढल्याचे पोलिसांच्या लक्षात आले.

 

 

याप्रकरणी बल्लारपूर पोलिस ठाण्यात कलम 103, 238, 3 (5 ) अन्वये गुन्हा दाखल करून गणेशचा मोठा भाऊ गुरूदास, वडील विश्वनाथ व आई कौशल्या भोयर यांना चौकशीसाठी ताब्यात घेतले आहे. या घटनेचा पुढील तपास राजुरा उपविभागीय पोलिस अधिकारी सुधीर नंदनवार व बल्लारपूर पोलिस ठाण्याचे निरीक्षक विपीन इंगळे यांच्या मार्गदर्शनात पोलिस उपनिरीक्षक राजेंद्र गायकवाड, वैभव चव्हाण, संतोष एनगंदेलवार, विसापूर चौकीचे अजय झाडे, विजय मैंद व पोलिस कर्मचारी करीत आहे.