होपचा शतकी जलवा अन्...

hopes-century-making-brilliance भारताविरुद्धच्या टी-२० सामन्यात २५० धावांचे आव्हान यशस्वीपणे पार करत वेस्ट इंडिजने सहा गडी राखून विजय मिळवला. या विजयाचा शिल्पकार ठरलेल्या कर्णधार शाई होपने आपल्या दमदार शतकानंतर सोशल मीडियावर केलेल्या पोस्टमुळे क्रिकेटविश्वाचे लक्ष वेधून घेतले आहे. ‘२५०? कूल’ असे कॅप्शन देत त्याने भारतीय कर्णधार शुभमन गिलच्या आधीच्या पोस्टला अप्रत्यक्ष प्रत्युत्तर दिल्याची चर्चा रंगली आहे.

रांची येथे झालेल्या या सामन्यात वेस्ट इंडिजची सुरुवात अडखळत झाली. डावाच्या पहिल्याच षटकात दोन फलंदाज बाद झाल्याने संघ अडचणीत सापडला होता. मात्र, शाई होपने परिस्थितीची जबाबदारी स्वीकारत आक्रमक फलंदाजी केली. त्याने अवघ्या ४५ चेंडूंमध्ये नाबाद १०२ धावा फटकावत संघाला १८.३ षटकांतच विजय मिळवून दिला. त्याच्या या खेळीमुळे २५० धावांचे मोठे लक्ष्यही वेस्ट इंडिजला सहज गाठता आले.

विजयानंतर होपने इन्स्टाग्रामवर स्वतःचा फोटो पोस्ट करत ‘२५०? कूल’ असे कॅप्शन दिले. या पोस्टची तुलना शुभमन गिलच्या एका जुन्या पोस्टशी केली जात आहे. भारताने वेस्ट इंडिजविरुद्धच्या एकदिवसीय सामन्यात ४०६ धावांचे लक्ष्य गाठून आठ गडी राखून विजय मिळवला होता. त्या सामन्यात गिलने नाबाद २२३ धावांची खेळी केली होती. त्यानंतर त्याने सोशल मीडियावर स्वतःचा फोटो शेअर करत ‘४०६? मस्त.’ असे कॅप्शन लिहिले होते. त्यामुळे होपची नवी पोस्ट गिलच्या त्याच कॅप्शनला दिलेले उत्तर असल्याची चर्चा क्रिकेट चाहत्यांमध्ये सुरू झाली आहे.

या शतकासह शाई होपने टी-२० आंतरराष्ट्रीय क्रिकेटमध्ये वेस्ट इंडिजकडून सर्वाधिक शतके झळकावणाऱ्या फलंदाजांच्या यादीत ख्रिस गेल आणि एव्हिन लुईस यांची बरोबरी केली. या तिन्ही फलंदाजांच्या नावावर प्रत्येकी दोन शतके आहेत. याशिवाय, वेस्ट इंडिजकडून टी-२० आंतरराष्ट्रीय क्रिकेटमध्ये सर्वात वेगवान शतक झळकावणाऱ्या फलंदाजांच्या यादीत होपने दुसरे स्थान मिळवले आहे. एव्हिन लुईसने अवघ्या ३९ चेंडूंमध्ये शतक पूर्ण करत या यादीत अव्वल स्थान कायम राखले आहे.