विमानसेवेचा फटका; इंडिगोची अनेक उड्डाणे रद्द

indigo cancels flights दिवाळी सणाच्या पार्श्वभूमीवर विमानप्रवासाचे नियोजन करणाऱ्या प्रवाशांसाठी महत्त्वाची बातमी आहे. इंडिगो एअरलाइन्सने छत्रपती संभाजीनगर विमानतळावरून होणारी काही विमान उड्डाणे रद्द करण्याचा निर्णय घेतला आहे. १५ ते ३१ ऑक्टोबरदरम्यान काही फेऱ्या बंद राहणार असल्याने हैदराबाद आणि नवी मुंबई मार्गावरील प्रवाशांना याचा मोठा फटका बसण्याची शक्यता आहे. ऐन सणासुदीच्या काळात उड्डाणे रद्द झाल्याने प्रवाशांची गैरसोय होण्याची भीती व्यक्त केली जात आहे.

 

 

इंडिगोचे विमानतळ व्यवस्थापक अनिरुद्ध पाटील यांनी यासंदर्भात भारतीय विमानतळ प्राधिकरणाला पत्र पाठवून उड्डाणे रद्द करण्याची माहिती दिली आहे. काही तांत्रिक आणि व्यवस्थापकीय कारणांमुळे हा निर्णय घेण्यात आल्याचे कंपनीकडून सांगण्यात आले आहे.

दिवाळीच्या काळात मोठ्या संख्येने नागरिक प्रवासाचे नियोजन करतात. अनेक प्रवाशांनी महिनाभर आधीच विमानांची तिकिटे आरक्षित केली आहेत. अशा परिस्थितीत अचानक उड्डाणे रद्द झाल्याने प्रवाशांना पर्यायी वाहतुकीची व्यवस्था करावी लागणार आहे. विशेषतः सणासाठी गावी जाणाऱ्या आणि कामानिमित्त प्रवास करणाऱ्या नागरिकांना या निर्णयाचा त्रास सहन करावा लागू शकतो.

हैदराबाद मार्गावरील सकाळी ८ वाजून १० मिनिटांनी आणि ८ वाजून ३० मिनिटांनी होणाऱ्या दोन्ही विमान फेऱ्या १७ आणि १९ ऑक्टोबर रोजी रद्द राहणार आहेत. त्याचप्रमाणे नवी मुंबई मार्गावरील संध्याकाळच्या विमान फेऱ्या १५ ते २४ ऑक्टोबरदरम्यान तसेच २६ ते ३१ ऑक्टोबरदरम्यान रद्द करण्यात आल्या आहेत.

या निर्णयामुळे प्रवाशांसमोर पर्यायी प्रवासाचा प्रश्न निर्माण झाला आहे. एटीडीएफचे सुनीत कोठारी यांनी बाधित प्रवाशांना तिकिटांचा परतावा द्यावा किंवा त्यांच्या प्रवासासाठी पर्यायी व्यवस्था करावी, अशी मागणी केली आहे. सणासुदीच्या काळात विमानांची तिकिटे मिळणे कठीण असताना उड्डाणे रद्द झाल्याने प्रवाशांच्या अडचणी वाढण्याची शक्यता आहे.

त्यामुळे संबंधित मार्गांवर प्रवासाचे आरक्षण केलेल्या प्रवाशांनी आपल्या विमानाची स्थिती तपासून पुढील नियोजन करणे आवश्यक ठरणार आहे. इंडिगोच्या या निर्णयामुळे दिवाळीच्या काळातील विमान प्रवासाच्या नियोजनावर परिणाम होण्याची शक्यता असून, प्रवाशांना दिलासा देण्यासाठी कंपनीकडून परतावा किंवा पर्यायी प्रवासाची व्यवस्था कशी केली जाते, याकडे लक्ष लागले आहे.