२० ऑक्टोबरपर्यंत जमावबंदी; पाचपेक्षा अधिक जणांच्या एकत्र येण्यावर निर्बंध

noida section 163 दिल्लीतील प्रस्तावित आंदोलनाच्या पार्श्वभूमीवर गौतम बुद्ध नगर पोलिसांनी संपूर्ण जिल्ह्यात भारतीय नागरिक सुरक्षा संहितेच्या (बीएनएसएस) कलम १६३ अंतर्गत प्रतिबंधात्मक आदेश लागू केले आहेत. १० ते २० ऑक्टोबर या कालावधीत लागू राहणाऱ्या या आदेशानुसार, पूर्वपरवानगीशिवाय पाच किंवा त्यापेक्षा अधिक व्यक्तींना एकत्र येणे, मिरवणुका काढणे, प्रक्षोभक भाषणे देणे आणि दिशाभूल करणारी माहिती पसरवणे यांसारख्या कृतींवर निर्बंध घालण्यात आले आहेत. शनिवारी सकाळपासून या आदेशाची अंमलबजावणी सुरू झाली.

 

 

‘कॉकरोच जनता पार्टी’ने (सीजेपी) दिल्लीमध्ये मोठ्या आंदोलनाचे आवाहन केले आहे. मुख्य निवडणूक आयुक्त ज्ञानेश कुमार यांच्या राजीनाम्याची मागणी या आंदोलनातून करण्यात येत आहे. देशातील निवडणूक प्रक्रियेत अनियमितता झाल्याचे आरोप विरोधी पक्षांसह विविध घटकांकडून करण्यात आले आहेत. या पार्श्वभूमीवर सीजेपीने आंदोलनाची हाक दिली आहे.

सीजेपीव्यतिरिक्त शेतकरी संघटना आणि युवक संघटनांसह अन्य गटांनीही उत्तर प्रदेशासह देशातील विविध भागांतील नागरिकांना आंदोलनात सहभागी होण्याचे आवाहन केले आहे. या घडामोडींच्या पार्श्वभूमीवर नोएडा परिसरातील सुरक्षा व्यवस्था अधिक कडक करण्यात आली आहे. दिल्लीला लागून असलेल्या सीमांवर अतिरिक्त पोलीस बंदोबस्त तैनात करण्यात आला असून, सीमा सुरक्षा दलासह (बीएसएफ) अन्य सुरक्षा यंत्रणांचीही मदत घेण्यात येत आहे.

अतिरिक्त पोलीस उपायुक्त (कायदा व सुव्यवस्था) अर्चना सिंह यांनी हे प्रतिबंधात्मक आदेश जारी केले आहेत. नवरात्रीचा उत्सव, १९ आणि २० ऑक्टोबरदरम्यान होणारे दसरा व महानवमीचे कार्यक्रम तसेच विविध परीक्षांच्या पार्श्वभूमीवरही हे निर्बंध लागू करण्यात आल्याचे पोलिसांनी स्पष्ट केले आहे. शेतकरी संघटना, राजकीय पक्ष आणि अन्य गटांकडून विविध मागण्यांसाठी सुरू असलेल्या आंदोलनांचाही या निर्णयामागे विचार करण्यात आला आहे. समाजकंटकांकडून सार्वजनिक शांतता आणि कायदा-सुव्यवस्थेला बाधा पोहोचवली जाण्याची शक्यता नाकारता येत नसल्याचे पोलिसांनी आदेशात नमूद केले आहे.

या आदेशानुसार, पोलीस आयुक्त, अतिरिक्त पोलीस आयुक्त किंवा पोलीस उपायुक्त यांची पूर्वपरवानगी घेतल्याशिवाय सार्वजनिक रस्त्यांवर किंवा टोल नाक्यांवर मिरवणुका काढता येणार नाहीत. अशा मिरवणुकांमध्ये सहभागी होण्यावरही निर्बंध असतील. तसेच सार्वजनिक ठिकाणी पाच किंवा त्यापेक्षा अधिक व्यक्तींना एकत्र येण्यासाठी परवानगी आवश्यक असेल. प्रक्षोभक घोषणा देणे, चिथावणीखोर भाषणे करणे, धार्मिक भावना दुखावणे, सामाजिक तणाव वाढवणे किंवा जातीय सलोखा बिघडवणाऱ्या कृती करण्यासही मनाई करण्यात आली आहे.चित्रण किंवा छायाचित्रणासाठी ड्रोनचा अनधिकृत वापर करण्यास बंदी घालण्यात आली आहे. सरकारी कार्यालयांच्या एक किलोमीटरच्या परिसरात ड्रोनद्वारे चित्रण करण्यावर पूर्ण प्रतिबंध असेल. सार्वजनिक ठिकाणी लावण्यात आलेल्या ड्रोन, बॅरिकेड्स, सीसीटीव्ही कॅमेरे किंवा ध्वनिक्षेपक यंत्रणांशी छेडछाड करण्यासही मनाई आहे. रात्री १० ते सकाळी ६ या वेळेत ध्वनिक्षेपक वापरण्यावर निर्बंध घालण्यात आले आहेत. सार्वजनिक रस्ते किंवा अन्य सार्वजनिक ठिकाणी पूर्वपरवानगीशिवाय धार्मिक कार्यक्रम आयोजित करता येणार नाहीत.

वादग्रस्त ठिकाणी अनधिकृत धार्मिक विधी करणे, धार्मिक अनादर करणे आणि चिथावणीखोर निदर्शने करणे यांनाही प्रतिबंध करण्यात आला आहे. शस्त्रे बाळगणे किंवा त्यांचे सार्वजनिक प्रदर्शन करणे, आनंदोत्सवाच्या नावाखाली हवेत गोळीबार करणे, सार्वजनिक ठिकाणी मद्यपान करणे, अफवा किंवा दिशाभूल करणारी माहिती पसरवणे आणि धोकादायक ठरू शकणाऱ्या वस्तूंचा साठा करणे यावरही बंदी असेल. जबरदस्तीने दुकाने किंवा व्यवसाय बंद पाडणे, अत्यावश्यक वस्तूंच्या पुरवठ्यात अडथळे निर्माण करणे तसेच चिनी मांजाच्या विक्रीवर आणि वापरावरही निर्बंध लागू करण्यात आले आहेत.

परीक्षा केंद्रांच्या २०० मीटर परिसरात मोठ्या जमावाला, अनधिकृत ध्वनिक्षेपकांना आणि छायाप्रती काढण्याच्या सुविधांना निर्बंध घालण्यात आले आहेत. परीक्षेदरम्यान परवानगीशिवाय इलेक्ट्रॉनिक उपकरणे वापरणे तसेच गैरप्रकारांसाठी अनुचित साधनांचा वापर करणेही प्रतिबंधित आहे.

दिल्लीतील आंदोलन, सण-उत्सव आणि परीक्षांच्या पार्श्वभूमीवर सार्वजनिक शांतता राखणे आणि कायदा-सुव्यवस्था अबाधित ठेवणे हा या निर्बंधांचा उद्देश असल्याचे पोलिसांनी स्पष्ट केले आहे. हे आदेश २० ऑक्टोबरपर्यंत लागू राहणार असल्याने या कालावधीत नागरिकांना सार्वजनिक कार्यक्रम आणि गर्दीशी संबंधित नियमांचे पालन करावे लागणार आहे.