पुण्यात पुन्हा हुंडाबळी; ३३ वर्षीय आयटी अभियंता महिलेची आत्महत्या

Another dowry death in Pune पुण्यात ३३ वर्षीय आयटी अभियंता महिलेने आत्महत्या केल्याची घटना समोर आली आहे. सासरच्या मंडळींकडून हुंड्यासाठी छळ केला जात असल्यामुळे मुलीने टोकाचे पाऊल उचलल्याचा आरोप तिचे वडील बाळकृष्ण निकम यांनी केला आहे. या प्रकरणी पोलिसांनी महिलेचा पती आणि त्याच्या कुटुंबीयांविरोधात गुन्हा दाखल केला आहे. या घटनेमुळे हुंड्याच्या मागणीवरून विवाहित महिलांना होणाऱ्या कथित छळाचा मुद्दा पुन्हा चर्चेत आला आहे.

 

 

 

 

बाळकृष्ण निकम यांनी दिलेल्या तक्रारीनुसार, त्यांची मुलगी तृष्णा हिचे २०१८ मध्ये राहुल सकपाळ याच्याशी लग्न झाले होते. लग्नानंतर तृष्णाच्या पगाराची रक्कम सासरच्या मंडळींना देण्यासाठी दबाव टाकला जात होता, असा आरोप तक्रारीत करण्यात आला आहे. तसेच माहेरचा फ्लॅट सासूच्या नावावर करण्याची आणि सासऱ्यांसाठी एक कोटी रुपयांचा फ्लॅट खरेदी करण्याची मागणीही करण्यात आल्याचे निकम यांनी म्हटले आहे. या मागण्यांवरून तृष्णाला शारीरिक आणि मानसिक त्रास सहन करावा लागत असल्याचा आरोप तिच्या वडिलांनी केला आहे.

 

तक्रारीनुसार, सासरच्या जाचाला कंटाळून तृष्णा २०२१ मध्ये माहेरी परतली होती. त्यानंतर काही काळाने तिच्या पतीने पुनर्विवाह करण्यासाठी घटस्फोटाचा अर्ज दाखल केला. हे प्रकरण सध्या न्यायालयात प्रलंबित आहे. दरम्यान, तृष्णाने गळफास घेऊन आत्महत्या केल्याची घटना घडली. या प्रकरणात पती आणि सासरच्या मंडळींविरोधात गुन्हा दाखल करण्यात आला असून, तक्रारीतील आरोपांची पुढील तपासात पडताळणी होणे आवश्यक आहे.