तालिबानच्या धोरणांचा क्रिकेटला फटका!

Taliban's policies deal a blow to cricket. अफगाणिस्तान प्रीमियर लीग (APL) सुरू होण्यापूर्वीच या स्पर्धेभोवती वाद निर्माण झाला आहे. तालिबानच्या राजवटीत महिलांच्या अधिकारांवर आणि क्रीडा क्षेत्रातील त्यांच्या सहभागावर लादण्यात आलेल्या निर्बंधांमुळे इंग्लंडच्या तीन क्रिकेटपटूंनी स्पर्धेच्या ड्राफ्टमधून माघार घेतली आहे. यामध्ये इंग्लंडचा कसोटी क्रिकेटपटू ओली पोप, डेव्हिड विली आणि विल स्मीड यांचा समावेश आहे. इंग्लंड क्रिकेट बोर्डाकडून (ECB) अफगाणिस्तानच्या या लीगमध्ये खेळण्यासाठी खेळाडूंना परवानगी द्यावी की नाही, यावर चर्चा सुरू असतानाच या तिघांनी माघार घेण्याचा निर्णय घेतला. ओली पोपने अलीकडेच इंग्लंडच्या कसोटी संघाचे नेतृत्व केले होते. तसेच त्याने इंग्लंड क्रिकेट बोर्डासोबत एक वर्षाचा नवा केंद्रीय करारही केला आहे. त्याचे नाव लीगच्या ड्राफ्टमध्ये समाविष्ट झाल्यानंतर इंग्लिश खेळाडूंच्या सहभागावर टीका झाली होती. त्यानंतर त्याने स्पर्धेतून माघार घेण्याचा निर्णय घेतल्याचे माध्यमांच्या वृत्तांत म्हटले आहे.

 

 

 

तालिबानने २०२१ मध्ये अफगाणिस्तानची सत्ता पुन्हा ताब्यात घेतल्यापासून महिलांचे अधिकार आणि क्रीडा क्षेत्रातील त्यांच्या सहभागावर लादण्यात आलेल्या निर्बंधांबाबत आंतरराष्ट्रीय स्तरावर चिंता व्यक्त केली जात आहे. याच पार्श्वभूमीवर इंग्लंड क्रिकेट बोर्डाने अफगाणिस्तानसोबत द्विपक्षीय क्रिकेट सामने न खेळण्याची भूमिका घेतली आहे. मात्र, आंतरराष्ट्रीय स्पर्धांमध्ये दोन्ही देशांचे संघ एकमेकांविरुद्ध खेळतात. ‘ईएसपीएनक्रिकइन्फो’च्या वृत्तानुसार, अफगाणिस्तान प्रीमियर लीगमध्ये इंग्लिश खेळाडूंच्या सहभागाचा मुद्दा इंग्लंड क्रिकेट बोर्डासाठी कायदेशीर आणि नैतिक अशा दोन्ही पातळ्यांवर आव्हानात्मक ठरला आहे. बोर्डाचे अध्यक्ष रिचर्ड थॉम्पसन यांनी गेल्या आठवड्यात खेळाडूंना लीगमध्ये सहभागी होण्यासाठी ना-हरकत प्रमाणपत्र (NOC) देण्याबाबत गंभीरपणे विचार करण्याची गरज व्यक्त केली होती. ब्रिटनमधील रोजगार आणि व्यापारविषयक कायद्यांमुळे खेळाडूंना अशा स्पर्धेत खेळण्यापासून रोखणे कायदेशीरदृष्ट्या कठीण ठरू शकते, असेही त्यांनी सूचित केले होते. पुरुष क्रिकेटचे संचालक रॉब की यांनीही खेळाडूंना या प्रकरणातील नैतिक बाजू लक्षात घेऊन निर्णय घेण्याचे आवाहन केले होते. अफगाणिस्तानमध्ये महिलांशी होत असलेल्या व्यवहाराशी आपण सहमत नसल्याचे सांगत, वैयक्तिक पातळीवर आपण या लीगमध्ये खेळण्यासाठी जाणार नसल्याचे त्यांनी स्पष्ट केले होते.

 

दरम्यान, अफगाणिस्तान प्रीमियर लीगच्या आयोजनाबाबतही अनिश्चितता कायम आहे. उपलब्ध वृत्तांनुसार, लीगमधील पाच फ्रँचायझींपैकी आतापर्यंत केवळ तीन फ्रँचायझींची विक्री झाली आहे. त्यामुळे स्पर्धेच्या भवितव्याबाबत प्रश्न उपस्थित होत आहेत. ही स्पर्धा २७ डिसेंबरपासून संयुक्त अरब अमिरातीमध्ये (UAE) आयोजित करण्याचे प्रस्तावित आहे. एकीकडे तालिबानच्या राजवटीशी संबंधित नैतिक मुद्द्यांमुळे इंग्लिश खेळाडू माघार घेत आहेत, तर दुसरीकडे फ्रँचायझींच्या विक्रीबाबतही अडचणी असल्याचे समोर आले आहे. त्यामुळे खेळाडूंचा सहभाग आणि आयोजनातील अनिश्चितता या पार्श्वभूमीवर अफगाणिस्तान प्रीमियर लीग नियोजित वेळापत्रकानुसार सुरू होणार का, याकडे क्रिकेटविश्वाचे लक्ष लागले आहे.