२० वर्षांपूर्वी सोनाली बेंद्रेकडून मिळालं होतं बक्षीस

prajakta mali हिंदी चित्रपटसृष्टीत आपल्या अभिनयाने आणि मोहक हास्याने ९० च्या दशकात प्रेक्षकांना भुरळ घालणारी अभिनेत्री सोनाली बेंद्रे आजही चाहत्यांमध्ये लोकप्रिय आहे. हिंदी चित्रपटांसोबतच तिने मराठी मनोरंजनविश्वातही आपली छाप उमटवली आहे. सध्या सोनाली तिच्या आगामी ‘सोहळा’ या चित्रपटाच्या प्रमोशनमध्ये व्यस्त असून, त्यानिमित्ताने ती विविध कार्यक्रमांमध्ये सहभागी होत आहे. नुकतीच तिने ‘कोण होणार करोडपती’ या मराठी क्विझ शोमध्ये हजेरी लावली. यावेळी बॉलिवूडची धकधक गर्ल माधुरी दीक्षित आणि सोनाली बेंद्रे यांची पहिल्यांदाच भेट झाली. दोघींमधील गप्पा, त्यांची धमाल आणि एकत्र काढलेले फोटो सोशल मीडियावर चर्चेचा विषय ठरले.

 

 

यानंतर सोनालीने लोकप्रिय विनोदी कार्यक्रम ‘महाराष्ट्राची हास्यजत्रा’मध्येही सहभाग घेतला. या मंचावर तिने कार्यक्रमातील कलाकारांसोबत मनमोकळ्या गप्पा मारत आनंदाचे क्षण घालवले. मात्र, या भेटीतील एक खास आठवण सध्या सर्वांचे लक्ष वेधून घेत आहे. कार्यक्रमाची सूत्रसंचालक आणि अभिनेत्री प्राजक्ता माळीसाठी सोनालीसोबतची ही भेट केवळ आजची नव्हती, तर तब्बल दोन दशकांपूर्वीच्या आठवणींना उजाळा देणारी होती.

प्राजक्ता माळीने आपल्या इन्स्टाग्राम खात्यावर सोनाली बेंद्रेसोबतचे दोन फोटो शेअर केले आहेत. यातील एका छायाचित्रात आजची लोकप्रिय अभिनेत्री प्राजक्ता लहान मुलगी असताना सोनालीच्या हस्ते बक्षीस स्वीकारताना दिसते. दुसऱ्या छायाचित्रात दोघींची अलीकडच्या काळातील भेट पाहायला मिळते. जुन्या आणि नव्या छायाचित्रांची ही सांगड चाहत्यांच्या विशेष पसंतीस उतरली आहे.

प्राजक्ताने २००४ मध्ये ‘क्या मस्ती क्या धूम’ या नृत्याधारित रिअॅलिटी शोमध्ये सहभाग घेतला होता. त्या वेळी ती लहान होती, तर सोनाली बेंद्रे या कार्यक्रमात परीक्षक म्हणून काम पाहत होती. याच कार्यक्रमादरम्यान सोनालीच्या हस्ते प्राजक्ताला बक्षीस मिळाले होते. त्या क्षणाचा फोटो प्राजक्ताने आता सोशल मीडियावर शेअर करत जुन्या आठवणींना उजाळा दिला आहे.विशेष म्हणजे, दोन दशकांपूर्वी सोनालीकडून बक्षीस स्वीकारणाऱ्या प्राजक्ताला आता पुन्हा तिच्यासोबत एकाच मंचावर येण्याची संधी मिळाली. एवढेच नव्हे, तर सोनालीच्या गाण्यावर तिच्यासमोर नृत्य करण्याचाही खास अनुभव प्राजक्ताला घेता आला. त्यामुळे ही भेट तिच्यासाठी अधिक संस्मरणीय ठरली.आपल्या पोस्टमध्ये प्राजक्ताने सोनालीच्या गाण्यावर तिच्यासमोर नृत्य करण्याची संधी मिळाल्याचा आनंद व्यक्त केला आहे. तसेच, ‘आजचा एपिसोड चुकवू नका,’ असे आवाहनही तिने चाहत्यांना केले आहे. तिच्या या पोस्टवर चाहत्यांकडून प्रतिक्रिया दिल्या जात असून, दोघींच्या जुन्या आणि नव्या छायाचित्रांची सोशल मीडियावर चर्चा सुरू आहे.

दरम्यान, प्राजक्ता माळीने आपल्या अभिनयाच्या जोरावर मराठी मनोरंजनसृष्टीत स्वतंत्र ओळख निर्माण केली आहे. ‘जुळून येती रेशीमगाठी’ या मालिकेमुळे ती घराघरांत पोहोचली. त्यानंतर ‘हम्पी’ आणि ‘डोक्याला शॉट’ यांसारख्या चित्रपटांतूनही तिने आपली अभिनयक्षमता दाखवून दिली. अभिनयासोबतच ती सोशल मीडियावरही सक्रिय असून, वैयक्तिक आयुष्यातील खास क्षण, कुटुंबीयांसोबतची छायाचित्रे आणि चित्रीकरणादरम्यानच्या आठवणी चाहत्यांसोबत शेअर करत असते.सोनाली बेंद्रेसोबतच्या या भेटीने प्राजक्ताच्या बालपणीच्या आठवणी पुन्हा ताज्या झाल्या आहेत. एका काळी ज्या अभिनेत्रीच्या हस्ते तिला बक्षीस मिळाले होते, त्याच अभिनेत्रीसमोर आज नृत्य करण्याची संधी मिळणे, हा तिच्या प्रवासातील एक खास योगायोग ठरला आहे.