पलकच्या स्टाइलने जिंका मनं!

win-hearts-with-palaks-style सणासुदीचा काळ जवळ आला की प्रत्येक तरुणीला आपल्या पेहरावातून वेगळी छाप पाडण्याची इच्छा असते. नवरात्रोत्सव, दुर्गापूजा, गरबा, दांडिया आणि दिवाळीसारख्या खास प्रसंगी पारंपरिक पोशाखाला आधुनिक फॅशनची जोड दिल्यास व्यक्तिमत्त्वाला अधिक आकर्षक रूप मिळू शकते. यासाठी अभिनेत्री पलक तिवारीच्या स्टायलिश पारंपरिक लूकमधून प्रेरणा घेता येईल. पलकने अलीकडेच गुलाबी साडीतील सुंदर छायाचित्रे सोशल मीडियावर शेअर केली असून, तिच्या या लूकची चर्चा होत आहे.

 

 

पलक तिवारीचा रॉयल पिंक साडीतील लूक सणासुदीसाठी खास पर्याय ठरू शकतो. तिने गुलाबी रंगाची आकर्षक साडी आणि त्यावर मॅचिंग स्लीव्हलेस ब्लाउज परिधान केला होता. साडीवरील हलक्या गुलाबी रंगातील नक्षीकामामुळे तिच्या पोशाखाला नाजूक आणि देखणे रूप मिळाले. मोकळे केस, तीन पदरी कानातले आणि एका हातात घातलेल्या गुलाबी बांगड्यांनी तिच्या लूकमध्ये अधिक भर घातली. फारसा भडकपणा न करता साधेपणातून उठून दिसणारा हा पेहराव नवरात्री, दुर्गापूजा किंवा दिवाळीच्या कार्यक्रमांसाठी निवडता येईल.

 

 

गरबा आणि दांडियासाठी काहीतरी रंगीबेरंगी आणि उत्साही पोशाख हवा असेल, तर पलकच्या बहुरंगी लेहेंग्यापासून प्रेरणा घेता येईल. स्लीव्हलेस ब्लाउज, अर्धवट बांधलेले केस आणि हातावर परिधान केलेले आकर्षक हँडफूल यामुळे या लूकला पारंपरिक आणि आधुनिक अशा दोन्ही शैलींचा मिलाफ मिळतो. नवरात्रीतील गरबा किंवा दांडिया नाईटसाठी असा पोशाख उठून दिसू शकतो.

 

 

साडी आणि लेहेंग्याव्यतिरिक्त अनारकली सूटदेखील सणासुदीच्या पोशाखासाठी चांगला पर्याय आहे. सध्या पेस्टल रंगांच्या पोशाखांना पसंती दिली जात आहे. त्यामुळे हिरव्या, गुलाबी किंवा आपल्या आवडीच्या अन्य रंगातील अनारकली सूट निवडता येईल. त्यासोबत मोठ्या आकाराचे कानातले आणि साधी हेअरस्टाइल केल्यास लूक अधिक खुलून दिसेल. पलक तिवारीच्या स्टाइलमधून प्रेरणा घेताना अॅक्सेसरीजची योग्य निवड केल्यास पोशाखाला आकर्षक रूप देता येते.

 

फॅशनमध्ये वेगळेपणा जपायचा असेल, तर कॉर्सेट ब्लाउजसोबत साडी किंवा लेहेंगा परिधान करण्याचा पर्यायही विचारात घेता येईल. लेहेंग्यासोबत कॉर्सेट स्टाइलचा ब्लाउज आणि त्याला साजेशी हलकी नेटची ओढणी वापरल्यास पारंपरिक पोशाखाला आधुनिक टच मिळतो. लग्नसमारंभ, सणासुदीचे कार्यक्रम किंवा खास सोहळ्यांसाठी हा लूक निवडता येईल.

 

शरारा सूटदेखील सध्या तरुणींमध्ये लोकप्रिय ठरत आहेत. नूडल स्ट्रॅप्स असलेला शरारा सूट निवडून त्यासोबत आकर्षक दागिने आणि योग्य पादत्राणांची जोड देता येईल. दिवाळीसारख्या सणासाठी हा पोशाख आरामदायी आणि स्टायलिश पर्याय ठरू शकतो. आपल्या आवडीनुसार रंग, डिझाइन आणि अॅक्सेसरीज निवडून पलक तिवारीच्या फॅशनमधून प्रेरित असा स्वतःचा वेगळा लूक तयार करता येईल.