शाळेच्या ढिगाऱ्याखाली चिमुरड्यांचा मृत्यू!

children-die पाकिस्तानातील पेशावर शहरात एका खासगी शाळेचे छत कोसळल्याने मोठी दुर्घटना घडली आहे. या घटनेत २७ विद्यार्थी आणि एका महिला शिक्षिकेसह एकूण २८ जणांचा मृत्यू झाला असून, ३० हून अधिक जण जखमी झाले आहेत. मृत विद्यार्थ्यांचे वय ७ ते १३ वर्षांदरम्यान असल्याची माहिती समोर आली आहे. या दुर्घटनेमुळे परिसरात शोककळा पसरली आहे. पेशावरमधील आफ्रिदी आबाद परिसरात गुरुवारी ही घटना घडली. छत कोसळल्यानंतर ढिगाऱ्याखाली अनेक जण अडकल्याची भीती व्यक्त करण्यात आली. घटनेची माहिती मिळताच बचाव पथके आणि रुग्णवाहिका घटनास्थळी दाखल झाल्या. ढिगारा हटवून जखमींना बाहेर काढण्याचे काम युद्धपातळीवर सुरू करण्यात आले.

 

 

या दुर्घटनेतील जखमींना पेशावर येथील लेडी रीडिंग रुग्णालयात दाखल करण्यात आले आहे. रुग्णालयाचे अधिकारी आसिम खान यांनी २८ जणांच्या मृत्यूच्या वृत्ताला दुजोरा दिला. या घटनेत ३० हून अधिक लोक जखमी झाले असून, त्यापैकी सहा जणांची प्रकृती गंभीर असल्याचे त्यांनी सांगितले. परिस्थितीचे गांभीर्य लक्षात घेऊन रुग्णालयात आपत्कालीन व्यवस्था सक्रिय करण्यात आली आहे. रुग्णालयाचे प्रवक्ते मुहम्मद आसिम यांनी दिलेल्या माहितीनुसार, मृत्यू झालेली सर्व मुले १३ वर्षे किंवा त्यापेक्षा कमी वयाची होती. दरम्यान, ढिगाऱ्याखाली आणखी काही जण अडकले असण्याची शक्यता असल्याने बचावकार्य सुरू ठेवण्यात आले आहे. त्यामुळे मृतांचा आकडा वाढण्याची भीती व्यक्त केली जात आहे.

 

या घटनेनंतर पाकिस्तानचे पंतप्रधान शाहबाज शरीफ यांनी तीव्र दुःख व्यक्त केले. मृतांच्या कुटुंबीयांप्रति त्यांनी संवेदना व्यक्त केल्या. तसेच, या दुःखद प्रसंगातून सावरण्यासाठी शोकाकुल कुटुंबीयांना धैर्य मिळावे, अशी प्रार्थना केली. पाकिस्तानमध्ये इमारतींचे छत किंवा संपूर्ण बांधकाम कोसळण्याच्या घटना यापूर्वीही घडल्या आहेत. बांधकामातील सुरक्षेच्या नियमांचे पालन न होणे आणि निकृष्ट दर्जाच्या साहित्याचा वापर ही अशा दुर्घटनांमागील प्रमुख कारणे मानली जातात. यावर्षी जूनमध्ये लाहोरमधील एका शिकवणी केंद्राचे छत कोसळून डझनाहून अधिक मुलांचा मृत्यू झाला होता. त्याआधी कराची शहरातील लयारी भागात पाच मजली इमारत कोसळली होती. या दुर्घटनेत २७ जणांचा मृत्यू, तर १० जण जखमी झाले होते. पेशावरमधील शाळेच्या दुर्घटनेने पुन्हा एकदा शैक्षणिक संस्थांच्या इमारतींची सुरक्षितता आणि बांधकामाच्या दर्जाबाबत गंभीर प्रश्न निर्माण केले आहेत. निष्पाप विद्यार्थ्यांचा झालेला मृत्यू आणि अनेक जणांची गंभीर प्रकृती यामुळे संपूर्ण परिसरात हळहळ व्यक्त केली जात आहे.