ध्रुव राठीच्या अडचणी वाढणार?

Dhruv Rathee's troubles प्रसिद्ध यूट्यूबर ध्रुव राठी याच्याशी संबंधित २०१८ मधील फौजदारी मानहानीच्या प्रकरणात दिल्लीतील साकेत न्यायालयाने नव्याने समन्स बजावण्याचे आदेश दिले आहेत. १२ ऑक्टोबर रोजी न्यायिक दंडाधिकारी राहुल जैन यांनी हा आदेश दिला. हरियाणातील गुरुग्राम येथे असलेल्या राठीच्या पत्त्यावर समन्स पाठवण्यात येणार असून, तक्रारदार विकास सांकृत्यायन ऊर्फ विकास पांडे यांना समन्स बजावणाऱ्या कर्मचाऱ्यासोबत जाण्याची परवानगीही न्यायालयाने दिली आहे. यापूर्वी २३ जुलै २०१९ रोजी राठीला समन्स बजावण्यात आले होते. मात्र, त्यानंतरही न्यायालयीन प्रक्रिया पूर्ण करण्यासाठी प्रयत्न सुरू असल्याचे तक्रारदाराच्या वकिलांनी न्यायालयाच्या निदर्शनास आणून दिले. समन्स बजावण्यासाठी आवश्यक प्रक्रिया शुल्क दोन दिवसांत जमा करण्याचे निर्देशही न्यायालयाने दिले आहेत.

 

 

 

हे प्रकरण मे २०१८ मध्ये ध्रुव राठीने प्रसिद्ध केलेल्या ‘BJP IT Cell Part II’ या व्हिडीओशी संबंधित आहे. भाजपच्या माहिती-तंत्रज्ञान विभागाशी संबंधित व्यक्तींनी आपली बदनामी करण्यासाठी लाच देण्याचा प्रयत्न केल्याचा आरोप राठीने व्हिडीओमध्ये केल्याचे तक्रारीत नमूद आहे. या व्हिडीओमुळे आपली प्रतिष्ठा आणि प्रतिमा मलिन झाल्याचा दावा विकास पांडे यांनी करत फौजदारी मानहानीची तक्रार दाखल केली होती. समाजमाध्यमांवर प्रसारित झालेला हा व्हिडीओ तत्कालीन दिल्लीचे मुख्यमंत्री अरविंद केजरीवाल यांनीही पुन्हा प्रसारित केला होता. त्यामुळे त्यांच्याविरोधातही कायदेशीर कार्यवाही सुरू करण्यात आली होती. राठी प्रामुख्याने परदेशात राहत असल्याने समन्स बजावण्यात अडचणी येत असल्याचे तक्रारदाराच्या वकिलांनी सांगितले. सध्या तो भारतात असून गुरुग्राम येथे वास्तव्यास असल्याची माहिती न्यायालयाला देण्यात आल्यानंतर नव्याने समन्स पाठवण्याचा निर्णय घेण्यात आला.

 

ध्रुव राठीविरोधातील इतर कायदेशीर प्रकरणेही यापूर्वी चर्चेत आली आहेत. भाजप नेते सुरेश करमशी नखुआ यांनी २०२४ मध्ये राठीविरोधात २० लाख रुपयांचा मानहानीचा दावा दाखल केला होता. एका व्हिडीओमध्ये आपल्याला ‘हिंसक आणि शिवीगाळ करणारा ट्रोलर’ म्हटल्याचा त्यांचा आरोप आहे. तसेच, सनातन धर्म आणि हिंदू देवतांबाबत कथित आक्षेपार्ह विधान केल्याच्या आरोपावरून अमित सचदेव यांनीही तक्रार दाखल केली होती. या प्रकरणांतील आरोप आणि न्यायालयीन प्रक्रिया स्वतंत्र आहेत. दरम्यान, १० ऑक्टोबर २०२६ रोजी दिल्लीतील जंतरमंतर येथे प्रस्तावित कॉक्रोच जनता पार्टीच्या आंदोलनाच्या पार्श्वभूमीवर राठीला गुरुग्राममधील निवासस्थानातून पोलिसांनी ताब्यात घेतले होते आणि सुमारे २२ तासांनंतर त्याची सुटका करण्यात आली होती. आता १७ ऑक्टोबर रोजी साकेत न्यायालयात होणाऱ्या सुनावणीकडे लक्ष लागले आहे. मानहानीच्या प्रकरणात अद्याप अंतिम निकाल लागलेला नसल्याने आरोप सिद्ध झाले आहेत, असा याचा अर्थ होत नाही.