दिल्लीच्या गोलंदाजीला ‘वास’चा दम!

delhis-bowling-gets-a-boost-from-vaas आयपीएल २०२७ च्या पार्श्वभूमीवर दिल्ली कॅपिटल्स संघाने आपल्या प्रशिक्षकवर्गात महत्त्वाचा बदल केला आहे. श्रीलंकेचे माजी वेगवान गोलंदाज चमिंडा वास यांची संघाच्या वेगवान गोलंदाजी प्रशिक्षकपदी नियुक्ती करण्यात आली आहे. ५२ वर्षीय वास हे या पदावर मुनाफ पटेल यांची जागा घेणार आहेत. दिल्ली कॅपिटल्सने सोशल मीडियाच्या माध्यमातून या नियुक्तीची माहिती दिली. दिल्ली कॅपिटल्सच्या प्रशिक्षकवर्गात यापूर्वीच माजी भारतीय क्रिकेटपटू सौरव गांगुली यांची मुख्य प्रशिक्षकपदी नियुक्ती करण्यात आली आहे. तसेच युवराज सिंग यांच्याकडे फलंदाजी प्रशिक्षकपदाची जबाबदारी सोपवण्यात आली आहे. आता चमिंडा वास यांच्या नियुक्तीमुळे संघाच्या वेगवान गोलंदाजी विभागाची जबाबदारी त्यांच्या खांद्यावर असेल.

 

 

चमिंडा वास हे डावखुरे वेगवान गोलंदाज म्हणून क्रिकेटविश्वात प्रसिद्ध आहेत. आयपीएलच्या सुरुवातीच्या तीन हंगामांपैकी २००८ ते २०१० या कालावधीत ते डेक्कन चार्जर्स संघाकडून खेळले. या संघासाठी त्यांनी १३ सामन्यांमध्ये १८ बळी घेतले होते. अॅडम गिलख्रिस्टच्या नेतृत्वाखाली खेळलेल्या डेक्कन चार्जर्स संघाने २००९ मध्ये दक्षिण आफ्रिकेत झालेल्या आयपीएलच्या दुसऱ्या हंगामात अंतिम सामन्यात रॉयल चॅलेंजर्स बंगळूरला पराभूत करून विजेतेपद पटकावले होते. त्या विजयी संघात वास यांचाही समावेश होता. वास यांच्या आंतरराष्ट्रीय क्रिकेटमधील कामगिरीची नोंदही उल्लेखनीय आहे. १९९४ ते २००९ या कालावधीत त्यांनी श्रीलंकेचे प्रतिनिधित्व करताना १११ कसोटी, ३२२ एकदिवसीय आणि ६ टी-२० आंतरराष्ट्रीय सामने खेळले. या तिन्ही प्रकारांत मिळून त्यांच्या नावावर ७६१ बळी आहेत. कसोटी क्रिकेटमध्ये त्यांनी ३५५, एकदिवसीय सामन्यांमध्ये ४००, तर टी-२० आंतरराष्ट्रीय सामन्यांमध्ये ६ बळी घेतले.

 

गोलंदाजीसोबतच वास यांनी फलंदाजीतही योगदान दिले आहे. कसोटी क्रिकेटमध्ये त्यांनी ३ हजार ८९ धावा, तर एकदिवसीय क्रिकेटमध्ये २ हजार २५ धावा केल्या आहेत. कसोटी सामन्यांमध्ये त्यांच्या नावावर एक शतक आणि १३ अर्धशतके आहेत. खेळाडू म्हणून आंतरराष्ट्रीय स्तरावर दीर्घ अनुभव असलेल्या वास यांनी प्रशिक्षक म्हणूनही विविध संघांसोबत काम केले आहे. त्यांनी सुरुवातीला न्यूझीलंड संघासोबत अल्पकालीन करारावर प्रशिक्षणाची जबाबदारी सांभाळली. त्यानंतर २०१३ ते २०१५ या काळात ते श्रीलंकेच्या राष्ट्रीय संघाच्या प्रशिक्षकवर्गात सहभागी झाले. २०१६ च्या टी-२० विश्वचषकासाठी त्यांची आयर्लंडच्या गोलंदाजी प्रशिक्षकपदी नियुक्ती करण्यात आली होती. तसेच २०२६ च्या लंका प्रीमियर लीगमध्ये त्यांनी कॅंडी रॉयल्स संघाचे मुख्य प्रशिक्षक म्हणून काम पाहिले. आता दिल्ली कॅपिटल्सच्या माध्यमातून वास प्रथमच आयपीएलमध्ये प्रशिक्षक म्हणून काम करणार आहेत. आगामी हंगामासाठी संघाच्या प्रशिक्षकवर्गात झालेल्या या नियुक्तीकडे महत्त्वपूर्ण बदल म्हणून पाहिले जात आहे.