पाऊस, शिट्ट्या अन् माईकवरील घोषणांनी १९ ठार

Stampede at a Durga Puja pandal in Kolkata उत्तर कोलकात्यातील चोरबागान दुर्गापूजा मंडपात झालेल्या चेंगराचेंगरीच्या दुर्घटनेत १९ जणांचा मृत्यू झाला, तर सुमारे २५ जण जखमी झाले. अचानक सुरू झालेल्या पावसापासून बचाव करण्यासाठी अनेकांनी मंडपात प्रवेश करण्याचा प्रयत्न केल्याने बाहेर पडण्याच्या मार्गाजवळ गर्दीचा दबाव वाढला. त्यातून गोंधळ निर्माण होऊन चेंगराचेंगरी झाल्याची प्राथमिक माहिती समोर आली आहे. मात्र, या दुर्घटनेचे नेमके कारण अद्याप स्पष्ट झालेले नाही. घटनेच्या चौकशीचे आदेश मुख्यमंत्री शुभेंदु अधिकारी यांनी दिले असून, मृतांच्या कुटुंबीयांना प्रत्येकी २५ लाख रुपये आर्थिक मदत आणि प्रत्येक कुटुंबातील एका सदस्याला नोकरी देण्याची घोषणा केली आहे.

 

 

 

 

प्राथमिक माहितीनुसार, मंडपात प्रवेशासाठी असलेला मार्ग काही ठिकाणी अरुंद होता. त्यातच पावसामुळे वाढलेली गर्दी आणि बाहेर पडण्याच्या मार्गावर निर्माण झालेला अडथळा यामुळे परिस्थिती बिघडल्याची शक्यता व्यक्त केली जात आहे. घटनास्थळी तैनात असलेल्या अधिकाऱ्यांकडून मिळालेल्या माहितीनुसार, खासगी सुरक्षा कर्मचाऱ्यांनी शिट्ट्या वाजवणे आणि ध्वनिक्षेपकावरून केलेल्या घोषणांमुळेही गोंधळ वाढला असावा. व्हीआयपी पासधारकांनाच प्रवेश दिला जाणार असल्याची घोषणाही करण्यात आल्याचे सांगितले जात आहे. या प्रकरणात पूजा आयोजक मंडळाचे पदाधिकारी, खासगी सुरक्षा कर्मचारी आणि कर्तव्यावर असलेल्या अधिकाऱ्यांना ताब्यात घेण्यात आल्याचे मुख्यमंत्र्यांनी सांगितले. दुर्घटनेनंतर गर्दी होणाऱ्या काही दुर्गापूजा मंडळांना तात्पुरते मंडप बंद ठेवण्याचा सल्ला प्रशासनाने दिला असून, अपघातस्थळावरील प्रवेशद्वारही बंद करण्यात आले आहे.

 

 

दरम्यान, मुख्यमंत्री शुभेंदु अधिकारी यांनी कोलकाता मेडिकल कॉलेज आणि रुग्णालयात जाऊन जखमींची माहिती घेतली. पंतप्रधान नरेंद्र मोदी, राष्ट्रपती द्रौपदी मुर्मू, केंद्रीय गृहमंत्री अमित शाह यांच्यासह अनेक नेत्यांनी या दुर्घटनेबद्दल दुःख व्यक्त केले. पंतप्रधान मोदी यांनी मृतांच्या कुटुंबीयांना प्रत्येकी दोन लाख रुपये, तर जखमींना प्रत्येकी ५० हजार रुपये मदत देण्याची घोषणा केली. कोलकात्यात दुर्गापूजेसाठी सुमारे ३,५०० मंडप उभारण्यात आले असून, या पार्श्वभूमीवर गर्दीचे नियोजन, प्रवेश-निर्गमन मार्गांची व्यवस्था आणि सुरक्षा उपाययोजनांची चौकशी केली जाणार आहे. दुर्घटनेमागील नेमके कारण तपास पूर्ण झाल्यानंतर स्पष्ट होईल.